Almatyda Powerexpo Almaty 2026 halyqaralyq energetıkalyq forýmy ótedi
ASTANA. KAZINFORM - 21–22 qazanda Almatydaǵy «Atakent» QІYO-da Powerexpo Almaty 2026 halyqaralyq energetıkalyq forýmy ótedi. Іs-sharaǵa memlekettik organdardyń, energetıkalyq kompanııalardyń, jabdyq óndirýshilerdiń, tehnologııalyq kompanııalardyń, ınvestorlar men salalyq sarapshylardyń ókilderi qatysady.
Bıyl Powerexpo Almaty kórmesi Kazatomexpo kórmesimen qatar ótedi. Bul bir alańda zamanaýı energetıkanyń negizgi baǵyttaryn — dástúrli jáne atom generatsııasyn, elektr jáne jylý jelilerin, energetıkalyq mashına jasaýdy, kommýnaldyq ınfraqurylymdy, tsıfrlyq tehnologııalar men jańa energetıkalyq sheshimderdi qamtýǵa múmkindik beredi.
Forýmnyń negizgi taqyryby — elektr energııasyna suranystyń ósýin, qoldanystaǵy qýattardy jańǵyrtýdy, jańa generatsııany iske qosýdy jáne elektr jelilerin ozyńqy damytýdy eskere otyryp, Qazaqstannyń energetıkalyq ınfraqurylymyn damytý.
Іskerlik baǵdarlamany «Almaty energetıkasy: 105 jyldyq damý jáne jańa ósý núkteleri» atty plenarlyq sessııa ashady. Qatysýshylar Almaty qalasy men Almaty energııa torabynyń 2035 jylǵa deıingi perspektıvalyq energııa teńgerimin, generatsııany damytýdy, magıstraldyq jáne taratý jelileriniń jaǵdaıyn, jańa iri tutynýshylardyń paıda bolýyn jáne energetıkalyq ınfraqurylymdy qalanyń damý josparlarymen úılestirý máselelerin talqylaıdy.
Jańa ósý núktelerine erekshe nazar aýdarylady. Bir pikirtalas alańynda Energetıka mınıstrligi, Almaty qalasynyń ákimdigi, KEGOC, AJK, «Samuryq-Energo», Alatau City, «Innovatsııalyq tehnologııalar parki» AEA jáne qalanyń iri ınfraqurylymdyq nysandarynyń ókilderin biriktirý josparlanyp otyr. Mundaı quram energııamen jabdyqtaý máselesin memleket pen energetıkalyq kompanııalar turǵysynan ǵana emes, naqty tutynýshy tarapynan da qarastyrýǵa múmkindik beredi.
Jeke pikirtalas blogy qalanyń, generatsııanyń, magıstraldyq jáne taratý jelileriniń damý josparlary merzim jaǵynan qanshalyqty úılesetinine arnalady. Negizgi mindet — 2035 jylǵa qaraı energetıkalyq ınfraqurylym Almatynyń odan ári damýyna shekteý bolmaýy úshin 2030 jylǵa deıin qandaı sheshimderdi iske asyrý qajet ekenin aıqyndaý.
Forýmnyń iskerlik baǵdarlamasynda jylý kózderin, JEO men kommýnaldyq ınfraqurylymdy jańǵyrtý, Qazaqstannyń perspektıvalyq energııa teńgerimin qalyptastyrý, zamanaýı energetıkalyq tehnologııalardy damytý, sondaı-aq data-ortalyqtar men jasandy ıntellekt ınfraqurylymyn energııamen qamtamasyz etý máseleleri de qarastyrylady.
Powerexpo Almaty 2026 kórme alańynda elektr energetıkasy men TKSh salasyna arnalǵan jabdyqtar men tehnologııalar usynylady. Olardyń qatarynda generatsııa jáne elektr jelileri keshenine arnalǵan sheshimder, esepke alý aspaptary, týrbınalyq jabdyqtar men quramdas bólshekter, kabeldik ónimder, oqshaýlaǵyshtar, avtomattandyrý, tsıfrlandyrý jáne energııa resýrstaryn basqarý júıeleri bar.
Powerexpo Almaty 2026 — Qazaqstan energetıkasynyń kelesi damý kezeńi qandaı bolýy kerektigin kásibı deńgeıde talqylaıtyn alań. Forým generatsııa men jelilerden bastap naqty tutynýshyǵa deıingi búkil tizbekti qamtyp, memleket, energetıkalyq bıznes, jabdyq óndirýshiler men ınvestorlar arasyndaǵy strategııalyq dıalogqa, tehnologııalyq sheshimder men tikeleı yntymaqtastyqqa múmkindik beredi.
Osyǵan deıin el energetıkasynyń qysqa qanshalyqty daıyn ekeni týraly jazdyq.
