Almatyda polıtsııaǵa qarsylyq kórsetken bir top adam ustaldy

ALMATY. KAZINFORM — Almatyda turǵyndar shaǵymy boıynsha kelgen tártip saqshylaryna qarsylyq kórsetkender ustaldy.

Oqıǵanyń beınejazbasy áleýmettik jelide tarady. Onda er adamnyń polıtsııa qyzmetkerine qarsy dóreki is-áreket jasaǵanyn, al janyndaǵy azamattar ony qostap turǵanyn kórýge bolady.

Almaty qalasy polıtsııa deparmentiniń málimetinshe, búgin tańerteń «102» qyzmetine qalanyń ortalyǵyndaǵy mekemede qoǵamdyq tártiptiń buzylǵany týraly habarlama túsken.

Oqıǵa ornyna birneshe patrýldik ekıpaj jiberilgen. Olar mas kúıindegi bir top azamatpen kezdesken.

— Atalǵan azamattar polıtsııa qyzmetkerleriniń zańdy talaptaryna dóreki túrde qarsylyq kórsetti. Qoǵamdyq tártip pen qaýipsizdikti qamtamasyz etý maqsatynda 6 azamattyń barlyǵy ustalyp, Almaly aýdandyq polıtsııa basqarmasyna jetkizildi. Olardyń árqaısysynyń áreketine quqyqtyq baǵa beriletin bolady, — dep habarlady polıtsııadan.

Bul derek boıynsha qylmystyq is qozǵalǵan. Qazirgi ýaqytta tergeý júrgizilip jatyr. Odan bólek quqyq buzýshylar ákimshilik quqyq buzýshylyqtar úshin de jaýapkershilikke tartylǵan.

Eske salaıyq, buǵan deıin Almatyda polıtsııa qyzmetkerine pyshaq jaraqatyn salǵandar sottalǵanyn jazǵanbyz.