Almatyda polıtsııaǵa baǵynbaǵan sheteldik 10 kúnge qamaldy

ALMATY. KAZINFORM – Almatyda polıtsııa talabyna baǵynbaǵan sheteldik ustaldy.

Qalalyq polıtsııa departamentiniń málimetinshe, patrýldik polıtsııa qyzmetkerleri Qyrǵyz Respýblıkasynyń azamaty tizgindegen sheteldik nómirli BMW kóligin toqtatty. Polıtseılerdiń zańdy talabyna baǵynbaı, júrgizýshi qujattardy kórsetýden bas tartyp, esikterdi qulyptap, uıyqtap jatqan adam sııaqty oryndyqty kórneki túrde artqa qısaıtqan.

- Mundaı minez-qulyq zańdy qurmettemeý jáne polıtsııanyń talaptaryn menmendikpen elemeý bolyp sanalady. Belgili bolǵandaı, kólik Qyrǵyzstanda tirkelgen jáne buǵan deıin Almatyda jol erejesin óreskel buzǵany úshin birneshe ret tirkelgen. Jalpy tólenbegen aıyppul somasy 404 000 teńge.

Kólik quraly mamandandyrylǵan aıyppul turaǵyna qoıyldy, - dep habarlady departamentten.

Al polıtsııa qyzmetkerleriniń zańdy talaptaryna baǵynbaý deregi boıynsha júrgizýshige qatysty ákimshilik materıal jınalyp, ol sot qaýlysymen 10 táýlikke qamaldy.

Eske salaıyq, buǵan deıin Almatyda moped urlaǵan kúdikti polıtsııa qyzmetkerin jolda súırep ketkenin jazǵanbyz.