Almatyda polıtsııa janynda arandatýshylyq beınejazba túsirgen turǵyn ustaldy
ALMATY. KAZINFORM — Almatyda polıtsııa kóliginiń syrtynan aq untaq kórsetken azamat ustaldy.
Ol polıtsııa kóliginiń syrtynan aq untaq salynǵan oramany kórsetip, áreketi kameraǵa túsirilgen. Sondaı-aq qoǵamdyq orynda balaǵat sózder aıtady. Beınejazba áleýmettik jelidegi paraqshalarda tarady.
Atalǵan jaǵdaı Almaty qalasy polıtsııa departamentiniń nazaryna ilikti. Tártip saqshylary haıp qýyp, polıtsııaǵa qarsy arandatýshylyqpen aınalysqan azamat ustalǵanyn málimdedi.
— Beınejazba avtorynyń jeke basy anyqtaldy. Ol — buryn sottalǵan 43 jastaǵy jergilikti turǵyn. Er adam ustalyp, Medeý aýdandyq polıtsııa basqarmasynyń polıtsııa bólimine jetkizildi. Yqtımal esirtki qylmysy boıynsha qylmystyq is qozǵaldy, — dep habarlady departamentten.
Odan bólek er adam usaq buzaqylyq jasaǵany úshin ákimshilik jaýapkershilikke tartyldy. Ákimshilik materıaldar sotqa joldanǵan. Endi polıtseıler beınejazbada kórsetilgen zattyń shyǵý tegin, quramyn jáne mólsherin anyqtaıdy.
Eske salaıyq, Astanada esirtki taratýmen aınalysqan uıymdasqan toptyń músheleri sottaldy.
