Almatyda polıtsııa samokat tizgindeýshilerge úndeý jasady
ALMATY. KAZINFORM – Almatyda polıtsııa elektrli samokatty paıdalanýshylarǵa úndeý jasady, dep habarlaıdy Polisia.kz.
Keıingi ýaqytta elektrli samokatty paıdalaný kezinde zań buzýshylyqtar jıiledi. Polıtsııa bul kólik túrin basqarý erekshe jaýapkershilik pen muqııattylyqty talap etetinin eskertedi.
Qoldaný erejelerin buzý jáne samokattardy retsiz turaqqa qoıý jaıaý júrginshilerdiń, sonyń ishinde balalardyń, ómiri men densaýlyǵyna qaýip tóndiredi. Osyǵan baılanysty polıtsııa qyzmetkerleri mobıldi toptarmen birlesip, qala kóshelerinde turaqty patrýl júrgizip jatyr.
Jaıaý júrginshilerdiń nemese kólik qozǵalysynyń erkin qozǵalýyna kedergi keltiretin, sondaı-aq samokattardy trotýarlar men jol boıyna qoıý derekteri anyqtalǵan jaǵdaıda, quqyq buzýshylar ákimshilik jaýapkershilikke tartylady.
Osy rette polıtsııa ókilderi ata-analarǵa da arnaıy úndeý jasaıdy: balalarǵa elektrli samokatty aıdaýǵa ruqsat bermeńizder. Bul – olardyń ómiri men densaýlyǵyna tónetin úlken qaýip. Zań kámeletke tolmaǵandardy tıisinshe qadaǵalamaǵany úshin ata-analarǵa da ákimshilik jaýapkershilikti qarastyrady.
– Elektrli samokatty paıdalanýshylardy jol qozǵalysy erejelerin qatań saqtaýǵa, jaıaý júrginshilerge qurmetpen qaraýǵa jáne Almaty kóshelerinde qaýipsizdikti qamtamasyz etýge shaqyramyz, - dedi Almaty qalasy PD jergilikti polıtsııa qyzmeti basqarmasy bastyǵynyń orynbasary Tımýr Noǵaıbaev.
Buǵan deıin Germanııada elektrli samokat apatynan qaza tapqandar sany artqanyn jazǵan bolatynbyz.