Almatyda polıtsııa metrodaǵy qaýipsizdik sharalaryn kúsheıtti
ALMATY. KAZINFORM – Almaty metropolıteninde polıtseıler jolaýshylardy aqparattandyrý men profılaktıkalyq sharalardy kúsheıtti.
Polıtsııa bastamasymen metro vagondary men stantsııalarynda dybystyq habarlamalar ornatyldy.
Sonymen qatar beketter men poıyz vagondarynda metro ishindegi minez-qulyq jáne qaýipsizdik erejeleri týraly kórneki aqparattyq jadynamalar ornalastyrylǵan. Onda evakýatsııa tártibi men tótenshe jaǵdaılar kezindegi is-qımyldar jóninde nusqaýlyqtar kórsetilgen.
– Metropolıten – azamattardyń jappaı júretin orny, munda árbir adamnyń qaýipsizdigi barlyǵynyń tártibine baılanysty. Polıtsııa metro ákimshiligimen birlesip turaqty túrde profılaktıkalyq jáne túsindirý jumystaryn júrgizedi. Bizdiń maqsatymyz – tek qoǵamdyq tártipti qamtamasyz etý emes, sonymen qatar jolaýshylar arasynda qaýipsizdik mádenıetin qalyptastyrý, - dedi metropolıtendegi polıtsııa basqarmasynyń bastyǵy Batyrjan Ábdýmasarov.
Polıtsııa mundaı jumys turaqty túrde júrgiziletinin, dybystyq habarlamalar men kórneki materıaldar quqyq buzýshylyqtyń aldyn alýǵa jáne túrli oqys oqıǵanyń qaýpin azaıtýǵa kómektesetinin atap ótti.
Eske salaıyq, buǵan deıin Almaty metrosynyń beketterinde 2026 jyly týrnıketter jańartylyp, jańa elektropoıyzdar alynatynyn habarlaǵan edik.
Al Almaty metrosy 30 qyrkúıekte, «Qaırat» – «Real Madrıd» matchy ótken kúni 142 932 jolaýshy tasymaldap, rekord ornatty.