Almatyda polıtsııa mefedronnyń zańsyz aınalymyn toqtatty

ALMATY. KAZINFORM – Almatyda sıntetıkalyq esirtki zattaryn zańsyz saqtady jáne taratty degen kúdikpen jas jigit ustaldy. Bul týraly Іshki ister mınıstrliginiń baspasóz qyzmeti habarlady. 

Ustaý sharasy esirtki qylmysyna qarsy is-qımyl basqarmasy qyzmetkerleriniń Áýezov aýdandyq polıtsııa basqarmasymen birlesip júrgizgen jedel-izdestirý is-sharalary barysynda júzege asyryldy.

Polıtsııa qyzmetkerlerin kórgen sátte kúdikti tyıym salynǵan zattardan qutylýǵa árekettengen, alaıda der kezinde ustaldy. Tekserý jáne protsessýaldyq áreketter barysynda odan erekshe ıisi bar untaq tárizdi zat salynǵan oramalar tárkilendi. Sot-saraptama qorytyndysyna sáıkes, atalǵan zat sıntetıkalyq esirtki – mefedron ekeni anyqtaldy.

Atalǵan derek boıynsha qylmystyq is qozǵaldy. Qylmystyń barlyq mán-jaıyn, sondaı-aq yqtımal sybaılastar men esirtki taratý arnalarynyń jolyn anyqtaýǵa baǵyttalǵan tergeý amaldary júrgizilip jatyr. 

Almaty qalasy PD esirtki qylmysyna qarsy is-qımyl basqarmasynyń bastyǵy Murat Jumabaevtyń aıtýynsha, mundaı faktiler polıtsııanyń erekshe baqylaýyna alynǵan.  

– Jastardy esirtkiniń zańsyz aınalymyna tartýdyń kez kelgen áreketiniń joly júıeli túrde kesilýde. Ótkizý tásili men qoldanylatyn tehnologııasyna qaramastan, mundaı qylmystar úshin jaýapkershilik qatań ári bultartpas bolady, - dedi Murat Jumabaev. 

Onyń sózinshe, megapolıste esirtki qylmystaryn anyqtaý jáne jolyn kesý jumystary júıeli negizde jalǵasady.

– Árbir osyndaı derek – azamattardyń densaýlyǵy men bolashaǵyna tóngen naqty qaýip. Polıtsııa qoǵamdy esirtki qaterinen qorǵaý úshin barlyq qajetti sharany qabyldaıdy, - dep túıindedi basqarma bastyǵy. 

Buǵan deıin habarlaǵanymyzdaı, Almaty polıtsııasy izdeýde júrgen esirtki taratýshylardy ustaý isine turǵyndardy da tartýdy josparlap otyr.