Almatyda polıtsııa qyzmetkerine pyshaq jaraqatyn salǵandar sottaldy

ALMATY. KAZINFORM –   Almatyda polıtsııa qyzmetkerine shabýyl jasap, qarý qoldaný oqıǵasyna qatysqan aıyptylar sottaldy. Bul týraly Bas prokýratýra málim etti.

— 2024 jylǵy 22 jeltoqsanǵa qaraǵan túni Almaty qalasynyń Medeý aýdanyndaǵy «Barland» barynda qonaqtarmen mekeme kúzetshileriniń qatysýymen keleńsiz oqıǵa boldy. Taraptar arasyndaǵy janjal urysqa ulasyp, jedel kelip jetken polıtsııa qyzmetkeri pyshaq jaraqatyn alǵan. Oqıǵa kezinde kúzetshilerdiń biri tirkelmegen travmatıkalyq tapanshamen eki ret oq atqan. Onyń qarý alyp júrýge jáne qoldanýǵa ruqsaty bolmaǵany, sondaı-aq resmı túrde jumysqa ornalaspaǵany anyqtaldy — kúzet qyzmetteri bir rettik negizde rásimdelmeı qyzmet atqarǵan, — dep habarlady prokýratýradan. 

Tergeý qorytyndysy boıynsha eki qatysýshyda ustalyp, Qazaqstan Respýblıkasy Qylmystyq kodeksiniń 293-baby 3-bóligimen (buzaqylyq) jáne 380-baby 3-bóligimen (bılik ókiline qatysty kúsh qoldaný) qylmystyq jaýaptylyqqa tartyldy.

Sot kúzetshini 5 jylǵa, ekinshi qatysýshyny 1 jyl 6 aıǵa sottady. Qala prokýratýrasynyń úılestirýimen osyndaı quqyq buzýshylyqtardyń aldyn-alý maqsatynda demalys jáne mereke kúnderi oıyn-saýyq mekemelerinde polıtsııa qyzmetkerleriniń kezekshiligi uıymdastyryldy.

Eske sala keteıik, buǵan deıin Almatyda burynǵy sýdıa Svetlana Jolmanovaǵa qatysty sot otyrysy besinshi márte keıinge shegerilgenin jazǵan bolatynbyz.