Almatyda polıtsııa qylmys jıi tirkelgen túngi klýbtardy «aqyldy kameralarmen» baqylaıdy
ALMATY. KAZINFORM – Almatydaǵy túngi klýbtar men oıyn-saýyq ortalyqtarynda qylmystyń aldyn alý úshin beıne taldaý júıesi engizildi. Polıtsııanyń málimetinshe, jańa tehnologııa ornatylǵannan keıin bul oryndarda birde-bir qylmys tirkelmegen.
«Zań men tártip» qaǵıdaty jáne Profılaktıka jyly aıasynda iske qosylǵan pılottyq joba 12 oıyn-saýyq ornynda jumys istep tur, buǵan deıin bul mekemelerde qylmys jıi tirkelgen.
Kameralar bet-álpetti taný jáne tótenshe jaǵdaılarǵa avtomatty túrde áreket etý fýnktsııalarymen jabdyqtalǵan, ıaǵnı tóbeles, adamdardyń toptasýy, agressıvti minez-qulyq, sondaı-aq qoǵamdyq tártipti usaq buzý jaǵdaılaryn tirkeýge alady.
Almaty polıtsııa departamentiniń bastyǵy Arystanǵanı Zapparovtyń aıtýynsha, júıe óz tıimdiligin dáleldep úlgergen.
– Júıe iske qosylǵan sátten bastap bul mekemelerde birde-bir qylmys tirkelgen joq. Sonymen qatar algorıtmder izdeýde júrgen adamdardy, sonyń ishinde qylmystyq ister boıynsha jáne habar-osharsyz ketken adamdardy der kezinde anyqtap, shara qabyldaýǵa múmkindik berdi. Bul – zamanaýı tehnologııalardyń azamattardyń qaýipsizdigin qamtamasyz etýdegi naqty dáleli, - dedi ol.
Beınejúıe qalalyq jedel basqarý ortalyǵymen biriktirilgen. Qaýip týyndaǵan jaǵdaıda polıtsııaǵa dereý habar beredi, osylaısha quqyq buzýshylar jazadan qutylmaıdy.
Qazir joba pılottyq kezeńde. Eger nátıje saqtalsa, «aqyldy» kameralar saıabaqtar, bazarlar, saýda jáne sport nysandaryna da ornatylmaq.
Eske salaıyq, buǵan deıin Almatyda polıtsııa metrodaǵy qaýipsizdik sharalaryn kúsheıtken edi.
Polıtsııa bastamasymen metro vagondary men stantsııalarynda dybystyq habarlamalar ornatyldy.
