Almatyda polıtsııa alaıaqtardy SIM-kartalarmen qamtamasyz etken topty ustady
ALMATY. KAZINFORM – Almaty polıtsııasy alaıaqtardy SIM-kartalarmen qamtamasyz etken topty ustady. Bul týraly Іshki ister mınıstrliginiń baspasóz qyzmeti habarlady.
Almaty qalalyq kıberpol qyzmetkerleri messendjerlerge tirkeý úshin kóp mólsherde SIM-kartalar men mobıldi telefondardy satyp alyp, paıdalanǵan adamdar tobyn ustady.
Tekserý barysynda 400-den astam SIM-karta, ondaǵan bank kartasy men birneshe mobıldi telefon tárkilendi. Atalǵan qurylǵylar zańsyz áreketter úshin qoldanylǵan.
Aldyn ala málimetter boıynsha, SIM-kartalar men telefondar telegram jáne whatsApp messendjerlerinde tirkeý kezinde rastaý kodtaryn qabyldaý úshin satyp alynǵan. Qazirgi tańda ustalǵan azamattardyń ınternet-resýrstar arqyly jasalǵan birqatar alaıaqtyqtarǵa qatysy bar-joǵyn tekserip jatyr.
– Internet-alaıaqtyqpen kúres – bizdiń basym baǵyttarymyzdyń biri. Biz SIM-kartalardyń zańsyz aınalymyna qatysty tizbekterdi anyqtap, polıtsııanyń ózge de bólimshelerimen birlese otyryp, barlyq mán-jaıdy anyqtaý jáne kinálilerdi jaýapkershilikke tartý maqsatynda keshendi tergeý is-sharalaryn júrgizip jatyrmyz, - dedi Almaty qalalyq PD kıberqylmysqa qarsy kúres basqarmasynyń bastyǵy Ánes Qaldybaev.
Qazirgi ýaqytta tolyq kólemde tergeý jáne jedel sharalar kesheni júrgizilip jatyr.
Buǵan deıin Qarjylyq monıtorıng agenttigi (QMA) azamattardy alaıaqtardyń jańa aıla-tásilderinen saq bolýǵa shaqyrǵanyn jazǵan edik.