Almatyda polıtsııa 70-ke jýyq samokatty aıyppul turaǵyna qoıdy
ALMATY. KAZINFORM – Almatyda jyl basynan beri elektr samokattar men elektr velosıped júrgizýshileri tarapynan 11 922 jol erejesin buzý áreketi tirkeldi.
Polıtsııa elektr samokattar men velosıped júrgizýshileri tarapynan jasalatyn zańsyzdyqtardyń aldyn alýǵa jáne jol erejesin qamtamasyz etýge baǵyttalǵan. Reıd sharalaryn júrgizip jatyr.
Sońǵy táýlikterde ǵana 1 076 jol tártibin buzý jaǵdaıy tirkeldi. Olardyń ishinde:
- jol qozǵalysyna qatysýshylardyń talaptardy saqtamaýy – 846;
- jaıaý júrginshiler men ózge de qatysýshylardyń erejeni buzýy – 229;
- ata-analardyń balalardyń qaýipsizdigin qamtamasyz etý mindetin oryndamaýy – 5 jaǵdaı.
Sonymen qatar, trotýar men jol boıynda samokattardyń qaraýsyz qaldyrylýy tirkeldi. Bul jaıaý júrginshiler men júrgizýshiler úshin qaýip tóndiredi. Nátıjesinde 69 elektrsamokat aıypturaqqa qoıyldy.
Almaty qalalyq Polıtsııa departamentiniń Jergilikti polıtsııa qyzmeti basqarmasynyń bastyǵy Serik Shumaevtyń aıtýynsha, elektrosamokattar qala ómiriniń bir bóligine aınalǵanymen, onymen birge quqyqbuzýshylyqtar sany da artyp otyr. Ol zań barlyq azamatqa ortaq ekenin atap ótti.
- Jaýapkershilik samokat júrgizýshileriniń ózine de, eger bala kámeletke tomaǵan bolsa, olardyń ata-analaryna da júkteledi. Biz tek jazalaý emes, túsindirý jumystaryn da júrgizemiz. Degenmen balalardyń qaýipsizdigi men joldaǵy tártip – bizdiń basymdyq, sondyqtan polıtsııa kez kelgen zańbuzýshylyqqa qatań shara qoldanady», – dedi ol.
Sondaı-aq kıksherıng kompanııalarynyń birimen kelisim jasalyp, polıtsııaǵa 50 samokat pen dýlyǵa jıyntyǵy tegin berildi. Bul patrýldeý kezinde qyzmetkerlerdiń mobıldiligin arttyrýǵa múmkindik beredi.
Polıtsııa elektrsamokat pen elektrvelosıpedti qoldanǵanda jol qozǵalysy erejelerin qatań saqtaý qajettigin eskertedi.
Osyǵan deıin Almatyda samokat aıdaǵan jasóspirimder náreste arbasyn qaǵyp ketkeni týraly jazdyq.