Almatyda polıtseı adamdardyń qaltasyna esirtki salǵany ras pa
ALMATY. KAZINFORM – Áleýmettik jelide polıtsııa qyzmetkerleriniń eki adamdy tutqyndap jatqan beınejazbasy tarady.
Odan jerde jatqan azamattyń qaltasyna polıtsııa qyzmetkeriniń bir zatty salǵanyn kórýge bolady. Jeli qoldanýshylary «ádeıi esirtki tastaý áreketi bolýy múmkin» dep boljady.
Biraq Almaty qalasynyń polıtsııa departamenti bul aqparat shyndyqqa janaspaıtynyn habarlady. Resmı málimetke sáıkes, polıtsııaǵa páterdi táýlikke jalǵa alǵan azamattar jaldaý aqysyn tólemegeni týraly habarlama kelip túsken. Oqıǵa ornyna ýchaskelik ınspektorlar bardy.
- Tekserý barysynda eki azamat ustaldy: bireýi kámeletke tolmaǵan, ekinshisi kámelet jasyna jetken. Kámeletke tolmaǵan azamat ata-anasyna tapsyryldy jáne ata-anasyna qatysty bala tárbıesin jaýapkershilikpen oryndamaǵany úshin ákimshilik hattama toltyryldy. Kámeletke tolǵan azamat alkogoldik masań kúıde bolyp, polıtsııa qyzmetkerleriniń zańdy talaptaryna baǵynbaǵan. Atalǵan quqyqbuzýshylyqtar úshin ol jaýapkershilikke tartyldy, - dep habarlady departamentten.
Sondaı-aq Almaty polıtsııasy beınejazbada qyzmetker ustalǵan azamattyń qaltasynan túsip qalǵan jeke zatyn qaıtaryp jatqan sáti beınelengenin atap ótti.
- Ustalǵan azamatqa eshqandaı tyıym salynǵan zattar «tastalǵan» joq. Almaty qalasy polıtsııa departamenti zań aıasynda áreket etedi jáne azamattardy tek resmı aqparat kózderine senýge shaqyrady. Jalǵan aqparat taratqandardyń jaýapkershilikke tartylatynyn eskertemiz, - dep habarlady polıtsııadan.
Eske salaıyq, buǵan deıin Almatyda AQSh-tan poshta arqyly kelgen esirtki tárkilendi.