Almatyda polıortalyqtar qurylysyna 118 mlrd teńge bólindi: qarajat qaıda jumsalady

ALMATY. KAZINFORM – Almatyda «Shyǵys qaqpasy» jáne «Batys qaqpasy» polıortalyqtarynda jańa joldar salýǵa qomaqty qarajat bólindi.

polıortalyq
Foto: Almaty ákimdigi

Úkimet Almaty qalasynyń 2040 jylǵa deıingi damý baǵyttaryn aıqyndaıtyn Bas josparǵa engizilgen ózgertýlerdi bekitti. Qujat boıynsha qalany damytýdyń polıtsentrlik modeline kóshý kózdelgen. Bul tásil qalada birneshe belsendi ortalyq qurýdy qarastyrady. 

jelisi
Foto: Almaty ákimdigi

Bas josparda kórsetilgen polıortalyqtar :

* Soltústik – ónerkásiptik aımaqtar men tozyǵy jetken turǵyn úılerdi jańǵyrtý, demalys aýmaqtaryn damytý jáne kógaldandyrý;
* Shyǵys qaqpasy – logıstıkalyq hab, kórme jáne oıyn-saýyq ınfraqurylymy, medıtsına men farmatsevtıka;
* Tarıhı ortalyq – týrızm, mádenıet jáne qyzmet kórsetý salasy;
* Batys – iri ónerkásiptik kásiporyndar men kólik-logıstıkalyq hab;
* Ońtústik-batys – shaǵyn ónerkásiptik parkter, saýda jáne logıstıka.

«Shyǵys qaqpasy»

Polıortalyqtardy damytý jumysy aıasynda qalanyń shyǵys bóliginde jańa joldar salý josparlanyp otyr. Tıisti konkýrs memlekettik satyp alý portalynda bıyl 10-13 qarasha arasynda ótkizildi. Tapsyrys berýshi – Almaty qalasynyń qurylys basqarmasy, al quny - 51 068 664 875,00 teńge. Onyń jeńimpazy «Kazahdorstroı» JShS atandy.

salý, jóndeý
Foto: Almaty ákimdigi

Degenmen «Almaty qalasynyń Medeý jáne Túrksib aýdandarynda ornalasqan «Shyǵys qaqpasy» polıortalyǵynda jol salý. ІІ kezek» atty lottyń tehnıkalyq ereksheliginde naqty qandaı jumystar isteletini kórsetilmegen. Osyǵan oraı, Kazinform agenttigi tıisti basqarmaǵa júginip, 51 mlrd teńgeden astam qarjy qaıda jumsalatynyn surady.

Almaty qalasy qurylys basqarmasy basshysynyń orynbasary Nurbek Jasybaevtyń aıtýynsha, «Shyǵys qaqpasy» polıortalyǵynda jol salý – II kezek» jobasyn iske asyrý sheńberinde kóshe-jol jelisi men ınjenerlik ınfraqurylym nysandaryn salýdy kózdeıtin jumys jobasy ázirlengen. Jobalyq qujattama boıynsha jalpy uzyndyǵy 13,149 km, onyń ishinde qurylys uzyndyǵy 12,577 km bolatyn 9 kóshe salý qarastyrylǵan. Atap aıtqanda: T-1, T-9, T-14, T-20, T-29, T-30, T-33, T-34 jáne M-1 kósheleri qamtylǵan.

jol, jaıaý júrginshi
Foto: Almaty ákimdigi

- Onda 16 baǵdarsham obektisin ornatylady jáne RPK-2T úlgisindegi 2 elektr energııasyn taratý pýnktin salynady. Joba aıasynda júris bóligin, jaıaý júrginshiler trotýarlaryn, velosıped joldaryn, avtoturaq alańdaryn jáne qoǵamdyq kólik aıaldamalaryn salý, sondaı-aq kógaldandyrý jáne irgeles aýmaqtardy abattandyrý jumystary kózdelgen, - dedi basqarma ókili.

Sonymen qatar ol Qonaev atyndaǵy Úlken Almaty kanaly arqyly uzyndyǵy 25,2 metr bolatyn kópir ótkeli salynatynyn atap ótti.

Odan bólek kóshe-jol jelisiniń tolyqqandy jumys isteýin qamtamasyz etý maqsatynda jobada ınjenerlik jelilerdi salý qarastyrylǵan:

* sýmen jabdyqtaý jelileri – 6,823 km;
* káriz jelileri – 8,748 km;
* gazben jabdyqtaý jelileri – 7,083 km;
* jylýmen jabdyqtaý jelileri – 13,584 km;
* baılanys jelileri – 56,620 km;
* 10 kV elektrmen jabdyqtaý kabeldik jelileri – 30,762 km;
* syrtqy jaryqtandyrý jelileri – 45,053 km.

- Qazirgi jaǵdaı boıynsha atalǵan nysannyń II kezegi boıynsha qurylys-montaj jumystary bastalǵan joq, - dedi Nurbek Jasybaev.

Qurylys basqarmasy basshysynyń orynbasary buǵan deıin «Shyǵys qaqpasy» polıortalyǵynda jol salý jobasynyń І kezegi aıasynda birqatar jumystar oryndalyp qoıǵanyn da aıtty. Onyń ishinde 3,8 km avtomobıl joldary salynyp, 4 km syrtqy elektr jaryqtandyrý jelileri tartylǵan jáne 2 taratý qosalqy stantsııasy ornatylǵan. Oǵan qosa, qurylysy aıaqtalǵan sharýashylyq-turmystyq káriz jelileri – 5,2 km, sý qubyry jelileri – 8 km, gazben jabdyqtaý jelileri – 6,1 km, baılanys jelileri – 4,3 km jáne elektrmen jabdyqtaý jelileri – 30,9 km. Atalǵan jumystary Medeý jáne Túrksib aýdandarynyń aýmaǵynda júrgizildi.

jol salý
Foto: Almaty ákimdigi

«Batys qaqpasy»

Osyǵan uqsas jumystar megapolıstiń batys bóliginde de júrgizilip jatyr. Buǵan deıin «Alataý aýdany, Momyshuly, Móńke bı, Ońǵarsynova kósheleri jáne Rysqulov dańǵylynyń sharshysynda jol salý» atty memlekettik satyp alý baıqaýy ótkenin jazǵanbyz. Mamyr aıynda bolǵan bul jobanyń jeńimpazy da «Kazahdorstroı» JShS, al tapsyrys berýshi – Almaty qalasynyń qurylys basqarmasy.

67 498 504 038 teńge bólingen joba boıynsha búginge deıin qandaı jumystar atqarylǵanyn qurylys basqarmasynan naqtyladyq. Nurbek Jasybaevtyń aıtýynsha, atalǵan joba «Batys qaqpa» polıortalyǵynda kólik jáne ınjenerlik ınfraqurylymdy damytý baǵyttalǵan.

- Búginde joba boıynsha bólingen qarajattyń 25%-y ıgerilgen. Ony tolyq aıaqtaý jáne paıdalanýǵa berý merzimi josparǵa sáıkes 2027 jylǵy 31 jeltoqsanǵa belgilengen, - dedi basqarma basshysynyń orynbasary.

jelisi
Foto: Almaty ákimdigi

Ol kórsetilgen aýmaqta uzyndyǵy 25,5 km bolatyn avtomobıl joldary, onyń ishinde: aýdandyq mańyzy bar 2,75 km magıstraldyq kósheler jáne turǵyn úı qurylysy aýmaǵyndaǵy jergilikti mańyzy bar 22,75 km kósheler salynyp jatqanyn atap ótti. Aıtýynsha, aýdandyq mańyzy bar magıstraldyq kósheler boıynsha qurylys-montaj jumystary 90% oryndalǵan. Jol tóseminiń negizgi qurylymdyq qabattaryn tóseý jumystary aıaqtalǵan. Onda qıyrshyq tasty-mastıkalyq asfaltbetonnan jol jabynynyń joǵarǵy qabatyn tóseý jumystary júrgizilip jatyr.

- Jalpy uzyndyǵy 4 km bolatyn jańa jergilikti mańyzy bar kóshelerde jer tósemin qalyptastyrý, jol negizin daıyndaý jáne asfaltbeton jabynynyń tómengi qabatyn tóseý jumystary aıaqtalǵan. Jol jabynynyń joǵarǵy usaq túıirshikti qabatyn tóseý jumystaryn 2026 jylǵy 30 qarashaǵa deıin aıaqtaý josparlanǵan, - dedi Nurbek Jasybaev.

Odan bólek aýdanda 10/0,4 kV bes taratý pýnktteriniń qurylysy 90%-ǵa jetken. Nysandarda iske qosý-baptaý jumystary júrgizilip jatyr. Injenerlik-kommýnıkatsııalyq jelilerdi júrgizý jumystarynyń kópshiligi 90%-ǵa jýyq aıaqtalǵan. Barlyq qurylysty 2027 jyly bitirý josparlanyp otyr.

jol salý
Foto: Almaty ákimdigi

Eske salaıyq, Almatyda 2030 jylǵa deıin 100 km aryq qalpyna keltiriledi.