Almatyda pnevmatıkalyq qarý men pyshaqtardy jelide satqandar anyqtaldy
ALMATY. KAZINFORM – Almatyda áleýmettik jelilerge júrgizilgen monıtorıng barysynda pnevmatıkalyq jáne sýyq qarýdy zańsyz satý deregi anyqtaldy.
Almaty qalasy Polıtsııa departamentiniń málimetinshe, jedel-izdestirý is-sharalarynyń nátıjesinde zańsyz aınalymnan pnevmatıkalyq qarýlar men sýyq qarý túrleri tárkilendi. Atalǵan derek boıynsha qylmystyq is qozǵalyp, qajetti tergeý amaldary júrgizilip jatyr.
Jyl basynan beri aýdandyq polıtsııa bólimsheleri júrgizgen jedel is-sharalar nátıjesinde zańsyz aınalymnan 619 tyıym salynǵan zat tárkilengen.
- Áleýmettik jelilerdegi zańsyz qarý saýdasy qoǵamdyq qaýipsizdikke tikeleı qater tóndiredi. Mundaı quqyq buzýshylyqtardyń árqaısysy aýyr qylmystardyń jasalý qaýpin arttyrady. Almaty polıtsııasy ınternet keńistigin turaqty baqylaýda ustap, jedel áreket etedi. Bul baǵyttaǵy jumys aldaǵy ýaqytta da kúsheıtiledi, — dedi qoǵamdyq qaýipsizdik basqarmasynyń bastyǵy Tımýr Noǵaıbaev.
Eske salaıyq, buǵan deıin zańsyz aınalymnan 25 atys qarýy tárkilendi.
