Almatyda plıta urlaý deregine qatysty tergeý qalaı júrip jatyr
ALMATY. KAZINFORM – Almatyda granıt plıtalardy urlaý deregi tirkeldi.
Jóndeý jumystary júrgizilip jatqan Úlken Almaty ózeniniń jaǵalaýynda granıt plıtalar alynyp, qulyptas ázirleıtin tsehke tasymaldanǵan. Bul derekke qatysty polıtsııa tekserý júrgizip, qylmystyq is qozǵady.
Kazinform agenttigi 1 aıǵa jýyq ýaqyttan keıin tergeý qanshalyqty alǵa jyljyǵanyn surap, qalalyq polıtsııa departamentine saýal joldady.
- Atalǵan derekke qatysty QR QK-niń 188-baby (urlyq) boıynsha qylmystyq is qozǵaldy. Óndiristi Bostandyq aýdandyq polıtsııa basqarmasy júrgizip jatyr. Kúdikti anyqtalyp, tıisti saraptamalar taǵaıyndaldy. Qylmystyq istiń basqa da mán-jaıy QR QІJK-niń 201-babynyń talaptaryna saı jarııa etilmeıdi, - delingen polıtsııa jaýabynda.
Sondaı-aq deparament tergeý jumystary jalǵasyp jatqanyn jáne istiń sotqa joldanbaǵanyn atap ótti.
Eske salaıyq, Almaty ákimi Bostandyq aýdanyndaǵy Úlken Almaty ózeniniń jaǵalaýynan granıt plıtalardyń urlanýyna qatysty qyzmettik tergeý bastaýdy tapsyrdy.