Almatyda páterden tolyq jabdyqtalǵan esirtki zerthanasy tabyldy
ASTANA.KAZINFORM — Almatyda esirtki qylmysyna qarsy is-qımyl bólinisiniń qyzmetkerleri men Áýezov aýdandyq polıtsııa basqarmasynyń polıtseıleri esirtki quramdy ósimdikterdi zańsyz ósirýge arnalǵan jasyryn zerthananyń jumysyn toqtatty. Bul týraly Almaty qalasynyń Polıtsııa departamenti málim etti.
— Tyıym salynǵan ósimdikterdi zańsyz ósirdi degen kúdikpen Áýezov aýdanynyń 53 jastaǵy turǵyny ustaldy, — delingen habarlamada.
Departamenttiń málimetinshe, páterge júrgizilgen tintý barysynda polıtseıler esirtki quramdy ósimdikterdi ósirýge arnalǵan tolyq jabdyqtalǵan júıeni anyqtalǵan. Onyń ishinde arnaıy kásibı qurylǵylarmen jabdyqtalǵan tórt groýboks, qarasoraǵa uqsas on alty túp ósimdik jáne keptirilgen ósimdik tektes zat tabylǵan.
Sonymen qatar, ósimdik tektes zat salynǵan, býyp-túıýge daıyndalǵan úsh júzge jýyq zip-paket, elektrondy tarazylar, vakýýmdyq qaptaý qurylǵylary, tyńaıtqyshtar men aqsha qarajaty tárkilengen.
— Tárkilengen barlyq ósimdikter men zattar olardyń túrin, salmaǵyn jáne quramyndaǵy esirtki zattarynyń bar-joǵyn anyqtaý úshin sot saraptamasyna joldandy, — dep habarlady departamentten.
Atalǵan derek boıynsha qylmystyq is qozǵaldy.
Polıtsııa esirtki quramdy ósimdikterdi zańsyz ósirý tásiline nemese anyqtalǵan kólemine qaramastan qylmystyq jaýapkershilikke ákep soǵatynyn eske saldy.
