Almatyda páterden esirtki jarnamasynyń QR kody bar 5 myń japsyrma tabyldy
ALMATY. KAZINFORM - Almatydaǵy turǵyn úı keshenderiniń birinde prokýratýranyń úılestirýimen Esirtki qylmysyna qarsy kúres bólimi men Bostandyq aýdandyq polıtsııa basqarmasynyń qyzmetkerleri eki er adamdy ustady.
Kúdiktilerdiń úıin tintý barysynda aq untaq zaty bar 156 baılam tabylǵan.
«Páterden esirtki satatyn saıtqa arnalǵan QR kody bar 5 myń jarnamalyq japsyrma, elektrondy tarazy jáne qaskóıler esirtkini bólshek saýdada satý úshin paıdalanǵan basqa da qural-jabdyqtar anyqtaldy jáne tárkilendi. Sot-hımııalyq saraptamasynyń qorytyndysyna sáıkes, tárkilengen aq tústi untaq zattar - «mefedron» psıhotroptyq zaty. Bostandyq aýdandyq polıtsııa basqarmasy esirtki zattaryn satý deregine qatysty qylmystyq is qozǵady. Eki kúdikti de ýaqytsha ustaý ızolıatoryna qamaldy», - dedi Almaty qalasy Polıtsııa departamenti bastyǵynyń birinshi orynbasary Qýatbek Naýatov.
Aıta ketken jón, QR QK-niń 201 babyna sáıkes ózge aqparat tergeý múddesine oraı jarııa etilmeıdi. QR Konstıtýtsııasynyń 77 baby 3-bólimi, 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady.
Eske salaıyq, buǵan deıin Almaty oblysynda esirtki óndiretin jasyryn zerthananyń joly kesilgenin jazǵanbyz.
