Almatyda parsy tilinen olımpıada ótti - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Tashkentte Ózbekstan men Qazaqstan yntymaqtastyǵy talqylandy – ÓzA
Tashkent qalasyndaǵy Ortalyq Azııa halyqaralyq ınstıtýtynda «Ózbekstan – Qazaqstan odaqtastyq qatynastarynyń jańa kezeńi: Buhara sammıtinen keıingi qadamdar» taqyrybynda dóńgelek ústel ótti.
Bul týraly osy aptada «ÓzA» aqparat agenttigi habarlady.
Habarlamada aıtylýynsha, is-shara barysynda eki el arasyndaǵy yntymaqtastyqtyń qazirgi jaı-kúıi men bolashaǵy talqylandy. 2025 jyldyń qorytyndysy boıynsha ózara saýda kólemi 4,8 mlrd dollarǵa jetip, bir jylda 16,2 paıyzǵa artqany aıtyldy. Taraptar bul kórsetkishti 10 mlrd dollarǵa jetkizýdi strategııalyq maqsat retinde belgiledi. Sondaı-aq jalpy quny 3,8 mlrd dollar bolatyn 52 birlesken ınvestıtsııalyq joba júzege asyrylyp jatyr.
Jıynda sarapshylar Qazaqstan men Ózbekstan arasyndaǵy qarym-qatynas strategııalyq áriptestik pen odaqtastyq deńgeıine kóterilgenin atap ótti. Parlamentaralyq yntymaqtastyqtyń da mańyzy artyp, saýda-ekonomıkalyq, ınvestıtsııalyq jáne mádenı-gýmanıtarlyq baılanystardy damytýǵa serpin berip otyrǵany aıtyldy.
Dóńgelek ústel qorytyndysynda ekijaqty jáne óńirlik áriptestikti odan ári tereńdetý jóninde usynystar ázirlendi.
Sondaı-aq «ÓzA»-da «Ózbekstan men Qazaqstan saqtandyrý salasyndaǵy yntymaqtastyqty nyǵaıtty» degen taqyryptaǵy aqparat jarııalandy.
Ózbekstandyq basylymnyń habarlaýynsha, Ózbekstan men Qazaqstan saqtandyrý salasyndaǵy áriptestikti jańa deńgeıge kóterip, ózara túsinistik týraly memorandýmǵa qol qoıdy.
Qujat Ózbekstan Respýblıkasynyń Saqtandyrý tólemderin kepildendirý qory men Qazaqstan Respýblıkasynyń «Saqtandyrý tólemderin kepildendirý qory» AQ arasynda jasaldy. Kelisim azamattardyń quqyqtaryn qorǵaý tetikterin kúsheıtýge jáne saqtandyrý júıesin damytýǵa baǵyttalǵan.
Memorandým aıasynda taraptar tájirıbe almasý, quqyqtyq jáne uıymdastyrýshylyq sheshimderdi zerdeleý, sondaı-aq zamanaýı basqarý men tsıfrlyq tehnologııalardy engizý boıynsha yntymaqtastyqty keńeıtpek. Sonymen qatar saqtandyrý júıesiniń turaqtylyǵyn arttyrý kózdelgen.
Atalǵan kelisim eki eldiń saqtandyrý naryǵyn damytýǵa, qyzmet sapasyn arttyrýǵa jáne saladaǵy ınstıtýtsıonaldyq negizderdi nyǵaıtýǵa yqpal etpek.
Qazaqstan túrki ıntegratsııasyn nyǵaıtýǵa erekshe mán beredi – Eurasia Today
Qazaqstan Túrki memleketteri uıymy (TMU) aıasyndaǵy ıntegratsııalyq úderisterdi odan ári damytý men nyǵaıtýǵa erekshe mán beretinin málimdedi, dep habarlady Eurasia Today aqparat agentti.
Atalǵan basylymnyń dereginshe, bul týraly Qazaqstan Respýblıkasynyń Syrtqy ister mınıstri Ermek Kósherbaev Túrki memleketteri uıymynyń Bas hatshysy Kýbanychbek Omýralıevpen kezdesýi barysynda aıtty. Kezdesýde taraptar uıym sheńberindegi yntymaqtastyqty tereńdetý jáne birlesken jobalardy iske asyrý máselelerin talqylady.
Mınıstr Qazaqstannyń TMU-nyń qurylýyna bastamashy el retinde túrki álemi elderi arasyndaǵy ózara is-qımyldy kúsheıtýge múddeli ekenin atap ótti. Sondaı-aq óńirlik jáne jahandyq ózekti máseleler boıynsha pikir almasý júrgizildi.
Túrki memleketteri uıymy 2009 jyly Nahchyvan kelisimi negizinde qurylǵan. Onyń maqsaty – túrkitildes memleketter arasyndaǵy saıası, ekonomıkalyq jáne mádenı yntymaqtastyqty nyǵaıtý. Uıymnyń bas keńsesi Ystanbul qalasynda ornalasqan.
Qytaı men Qazaqstan arasyndaǵy saýda kólemi aıtarlyqtaı artty – Halyq gazeti
Qytaı men Qazaqstan arasyndaǵy saýda kólemi 2026 jyldyń birinshi toqsanynda 46,6 paıyzǵa ósip, 13,243 mlrd AQSh dollar boldy. Bul týraly Qytaı Bas keden basqarmasynyń resmı derekterinde habarlandy.
Sonymen qatar osy aptada Qytaıdyń Halyq gazeti habarlady.
Málimetke sáıkes, osy kezeńde Qytaıdyń Qazaqstanǵa eksporty 6,443 mlrd dollarǵa jetip, 7,1 paıyzǵa artqan. Al Qazaqstannan Qytaıǵa ımport kólemi 6,8 mlrd dollarǵa jetip, ótken jylmen salystyrǵanda 125,2 paıyzǵa ósken.
Naýryz aıynyń ózinde eki el arasyndaǵy saýda aınalymy 3,4932 mlrd dollar boldy. Onyń ishinde Qytaı eksporty 1,9146 mlrd dollar, al Qazaqstannan ımport 1,5786 mlrd dollar bolǵan.
Sondaı-aq 2025 jyly Qytaı men Qazaqstan arasyndaǵy jalpy saýda kólemi 48,68 mlrd dollarǵa jetip, 2024 jylmen salystyrǵanda 11 paıyzǵa artqany atalyp ótti.
Sonymen qatar osy aptada Halyq gazetinde «Chjantszıakoý – Almaty baǵytyndaǵy júk poıyzy turaqty jumysqa kóshti» degen taqyryptaǵy aqparat jaryq kórdi.
Atalǵan BAQ-tyń málimetinshe, Qytaıdyń Chjantszıakoý qalasynan Qazaqstannyń Almaty qalasyna baǵyttalǵan Ortalyq Azııa júk poıyzy turaqty jumysqa kóshti.
22 sáýir kúni avtokólik bólshekteri tıelgen poıyz Qytaı temirjoly Beıjiń tobyna qarasty logıstıka ortalyǵynan jolǵa shyqqan. Poıyz Alashankoý shekara ótkeli arqyly ótip, Qazaqstan aýmaǵyna kiredi.
Bul joba Hebeı ólkesindegi Chjantszıakoý qalasynyń Ortalyq Azııa baǵytyndaǵy júk tasymalyn alǵash ret júıeli túrde iske qosýyn bildiredi. Jańa baǵyt óńiraralyq logıstıka baılanysyn nyǵaıtyp, saýda aınalymyn arttyrýǵa múmkindik beredi.
Aldaǵy ýaqytta bul baǵyt boıynsha júk poıyzy aı saıyn bir ret turaqty túrde qatynaıtyn bolady.
Almatyda parsy tilinen tildik olımpıada ótti – ParsToday
Almaty qalasynda parsy tilinen dástúrli tildik olımpıada ótti. Bilim saıysy joǵary oqý oryndarynyń stýdentteri arasynda uıymdastyryldy, dep jazdy ParsToday aqparat agenttigi.
Irandyq BAQ-tyń málimetinshe, is-sharany Qazaq ulttyq qyzdar pedagogıkalyq ýnıversıtetiniń Shetel tilderin kásibı daıarlaý kafedrasy Iran Islam Respýblıkasy Bas konsýldyǵynyń mádenı ókildigimen birlesip, Ǵylym dekadasy aıasynda ótkizdi. Olımpıada 2026 jylǵy 22 sáýirde ótti.
Olımpıadaǵa parsy tilin ekinshi shetel tili retinde oqyp jatqan Qazaq ulttyq qyzdar pedagogıkalyq ýnıversıteti men ál-Farabı atyndaǵy QazUÝ magıstranttary qatysty. Qatysýshylar tildik bilimi men daǵdylaryn synǵa saldy.
Parstoday aqparat agenttiginiń habarlaýynsha, ashylý rásiminde ýnıversıtet prorektory A.T.Kýlsarıeva sóz sóılep, bul is-sharanyń tek bilim saıysy ǵana emes, mádenı baılanystardy nyǵaıtatyn mańyzdy alań ekenin atap ótti. Sondaı-aq Irannyń Bas konsýly S.Ahmadı qatysýshylarǵa sáttilik tiledi.
Qorytyndysynda jeńimpazdarǵa halyqaralyq sertıfıkattar men dıplomdar tabystalǵan.
Túrkııa Qarjy mınıstri jahandyq ekonomıkadaǵy táýekelder týraly eskertti – TRT
Túrkııa Qarjy mınıstri Mehmet Shımshek álemdik ekonomıkanyń buryn-sońdy bolmaǵan deńgeıde belgisizdikke tap bolǵanyn málimdedi.
Mınıstrdiń aıtýynsha, jahandyq deńgeıde qaqtyǵystar men geosaıası shıelenister kúsheıip, bul ekonomıkalyq ósimniń baıaýlaýyna ákelýi múmkin. Sonymen qatar halyqaralyq protektsıonızm men ekonomıkalyq bólshektený úrdisi de artyp keledi, dep habarlady Túrkııa Radıo Televızııa portaly.
Atalǵan BAQ-tyń dereginshe, osy syn-qaterlerge jaýap retinde Túrkııa óńirlik jáne jahandyq saýda baǵyttaryn damytýǵa basymdyq berip otyr. Atap aıtqanda, Basradan Túrkııaǵa deıin sozylatyn «Damý joly» jobasy júzege asyrylyp jatyr. Bul bastama shamamen 1200–1250 shaqyrymdy qamtıtyn temirjol, avtojol jáne energetıkalyq dálizdi biriktiredi.
Jobaǵa BAÁ, Katar jáne Irak seriktes retinde qatysyp jatyr. Sonymen qatar Orta dáliz Azııa men Eýropany baılanystyratyn mańyzdy baǵyttardyń biri retinde qarastyrylyp otyr.
Mınıstrdiń málimetinshe, jobalardyń shamamen 83 paıyzy halyqaralyq qarjy uıymdary tarapynan qarjylandyrylady. Budan bólek, Túrkııa Orta dálizdi damytý maqsatynda Dúnıejúzilik bankpen kelisimge qol qoıǵan.
Sondaı-aq osy aptada «TRT»-da «Túrkııa 15 jasqa tolmaǵan balalarǵa áleýmettik jelini paıdalanýǵa tyıym saldy» degen taqyryptaǵy aqparat jaryq kórdi.
Atalǵan basylymnyń Anadolu agenttigine silteme jasap habaralýynsha, Túrkııa 15 jasqa tolmaǵan balalardyń áleýmettik jeli platformalaryn paıdalanýyna tyıym salatyn jańa erejelerdi kúshine engizdi, dep habarlaıdy Anadolu agenttigi.
Jańa retteýler balalar men jasóspirimderdiń onlaın qaýipsizdigin kúsheıtýge baǵyttalǵan. Qujatqa sáıkes, 15 jasqa deıingi qoldanýshylar áleýmettik jelilerde tirkele almaıdy. Al platformalar paıdalanýshylardyń jasyn rastaý júıelerin engizýge mindetti.
Sonymen qatar áleýmettik jeli operatorlary 15 jastan asqan paıdalanýshylarǵa jas ereksheligine saı saralanǵan qyzmet usynýy tıis. Qujatta ata-analyq baqylaý tetikterin kúsheıtý de qarastyrylǵan.
Atap aıtqanda, akkaýnt baptaýlaryn basqarý jáne ekran aldynda ótkiziletin ýaqytty shekteýge arnalǵan quraldar engiziledi. Budan bólek, kompanııalar jańylystyratyn jarnamanyń aldyn alyp, zııandy kontentti joıý boıynsha shara qabyldaýǵa mindetti.
Ulttyq qaýipsizdikke qatysty shuǵyl jaǵdaılarda iri platformalar kontentti alyp tastaý týraly talaptardy bir saǵat ishinde oryndaýy kerek. Sondaı-aq táýligine 10 mıllıonnan astam qoldanýshysy bar platformalarǵa qatań talaptar qoıylady.