Almatyda Parıj Olımpıadasynyń júldegerlerine páter kilti tabystaldy
ALMATY. KAZINFORM – Almaty ákiminiń orynbasary Beıbit Shahanov Parıjdegi jazǵy Olımpıada oıyndarynda medal alǵan sportshylarǵa páter kiltterin tabys etti.
Bes sportshy jańa páterge ıe boldy. Sporttyq gımnastıkadan Olımpıadanyń kúmis júldegeri Narıman Qurbanov eki bólmeli páter aldy. Qola júldegerler – boksshy Nazym Qyzaıbaı men mergen Islam Sátbaevqa bir bólmeli páter berildi.
Qazirgi ýaqytta qola medal ıegerleri, dzıýdoshy Ǵusman Qyrǵyzbaev pen pnevmatıkalyq myltyq atýdan Aleksandra Le jattyǵý jıyndary men halyqaralyq jarystarǵa qatysyp jatyr. Sondyqtan olarǵa baspana kiltteri Almatyǵa oralǵannan soń beriledi.
– Sizdirdiń jeńisterińiz – kóp jylǵy qajyrly eńbektiń nátıjesi jáne keıingi jas sportshylarǵa úlgi. Almaty eńbekterińizdi joǵary baǵalaıdy jáne jańa jetistikterge jetý jolynda sizderdi únemi qoldaıdy, - dedi Beıbit Shahanov.
Eske salaıyq, byltyr 20 tamyz kúni Almaty qalasynyń ákimdiginde Olımpıada júldegerlerimen saltanatty kezdesý ótti. Іs-shara aıasynda sportshylarǵa aqshalaı sertıfıkattar, avtokólik kiltteri, sondaı-aq turǵyn úı alýǵa sertıfıkattar tabys etilgen bolatyn.
– Júldegerlerge berilgen sertıfıkat – tıtýldy sportshylardy páterlermen qamtamasyz etý tetiginiń birinshi kezeńi. Sertıfıkattar tapsyrylǵannan keıin turǵyn úı satyp alý rásimi iske qosyldy. Bul protsess jeke bıýdjetti qalyptastyrýdy jáne konkýrs jarııalaýdan bastap sharttar jasasýǵa deıingi barlyq qajetti memlekettik satyp alý rásimin ótkizýdi qamtıdy. Bul protsedýralar zańnamamen qatań retteledi jáne belgili bir ýaqytty qajet etedi. 2025 jyldyń 9 qańtarynda barlyq zańdy jáne satyp alý protsedýralary aıaqtaldy. Sportshylardyń jaıly ómir súrý jaǵdaılaryn qamtamasyz etý úshin páterlerde árleý jumystary júrgizildi. Sport basqarmasynyń qyzmetkerleri osy ýaqyt ishinde ár júldegermen baılanysta boldy jáne kiltterdi tapsyrý kúni árqaısysymen kelisildi, - dep atap ótti ákimdikten.
Aıta keteıik, Nazym Qyzaıbaı Olımpıadanyń qola júldesin jeńip alǵan bolatyn.
Olımpıadanyń qola júldegeri Ǵusman Qyrǵyzbaevtyń aǵa leıtenant bolyp baryp, kapıtan bolyp qaıtqany týraly jazǵan edik.