Almatyda ózin polıtsııa qyzmetkeri dep tanystyrǵandar ustaldy

ІІM bopsalaý, qorqytý jáne quqyq qorǵaý organdary qyzmetkerleriniń mártebesin zańsyz paıdalaný faktilerine baılanysty qylmystardyń jolyn kesý boıynsha júıeli jumysty jalǵastyryp jatyr.

— Almatyda ózderin uıymdasqan qylmysqa qarsy kúres basqarmasynyń qyzmetkerleri retinde tanystyryp, qarý qoldanyp, megapolıs turǵynynan aqsha talap etken adamdar ustaldy.

Atap aıtqanda, 10 tamyzda bir top adam aldyn ala sóz baılasyp, jábirlenýshiniń sońynan ańdyǵan. Ózderin polıtsııa qyzmetkerleri retinde tanystyryp, tapanshamen qorqytyp, ony kólikke otyrýǵa májbúrlegen jáne qala syrtyna alyp ketken.

Olar qysym kórsetip jábirlenýshini týysyna qońyraý shalýǵa májbúrlegen. Osylaısha týysy olar kórsetken nómirge 3 mln teńge aýdarǵan, — delingen ІІM habarlamasynda.

Osy aýyr qylmysty jasaǵany úshin uıymdasqan qylmysqa qarsy kúres basqarmasynyń qyzmetkerleri buryn sottalǵan tórt adamdy ustady. Olardyń bireýi buǵan deıin adam óltirgeni úshin jazasyn ótegen. Barlyǵy ýaqytsha ustaý ızolıatoryna qamaldy.

— Tintý barysynda 2 myltyq, karabın, gaz tapanshasy jáne oq-dáriler tárkilendi. Tergeý amaldary jalǵasyp jatyr, — delingen habarlamada.

Osyǵan uqsas qylmystyq is Aqtóbe oblysynda da qozǵaldy. Onda buryn sottalǵan jergilikti turǵyn ustaldy. Ol da ózin uıymdasqan qylmysqa qarsy kúres basqarmasynyń qyzmetkeri retinde tanystyryp, jergilikti turǵyndardan psıhologııalyq qysym kórsetý arqyly aqsha talap etken.

ІІM azamattardy qyraǵy bolýǵa jáne ózderin quqyq qorǵaý organdarynyń qyzmetkerleri retinde tanystyratyn adamdardyń qorqytýy men qysymyna berilmeýge shaqyrady.

Mundaı jaǵdaılar týyndaǵan kezde dereý polıtsııaǵa júginý qajet. 

Aıta ketelik BQO sotynda bopsalaýmen aınalysqan uıymdasqan toptyń isi qaralyp jatqany týraly jazǵan edik.