Almatyda ózen jaǵalaýyndaǵy jaıaý júrginshiler joly opyryldy
ALMATY. KAZINFORM – Almatyda jaýyn-shashyn saldarynan jaıaý júrginshiler joly zaqymdandy.
Áleýmettik jelilerde taraǵan beınejazbadan ózen jaǵalaýynyń opyrylyp, jolǵa salynǵan plıtalardyń bir bóligi sýmen aǵyp ketkenin kórýge bolady.
Atalǵan jaǵdaıǵa baılanysty Almaty ákimdigi túsinikteme berdi. Jergilik atqarýshy organnyń jaýabyna sáıkes, bıyl 10 mamyrda Kokjiek Garden saıabaǵynyń aýmaǵynda sý deńgeıi kóterilip, Esentaı ózeni arnasynan shyqqan. Sonyń saldarynan jaıaý júrginshiler ınfraqurylymyna ishinara zaqym kelgen.
- Sý basý saldaryn jedel joıý maqsatynda Sunshine merdiger uıymy ózen arnasyn sý aǵysyna kedergi keltirgen qoqys pen shógindilerden tazartty. Qabyldanǵan sharalar jaǵdaıdy turaqtandyrýǵa jáne sýdyń kedergisiz aǵýyna múmkindik berdi, - dep habarlady ákimdikten.
Qazirgi ýaqytta 2024 jyly Kokjiek Garden saıabaq aımaǵyn kúrdeli jóndeý júrgizgen «Eńbek» JShS merdiger uıymyna kepildik mindettemelerge sáıkes qalpyna keltirý jumystaryn júrgizý týraly talap-hat daıyndaldy. Sonyń negizinde saıabaq aýmaǵyndaǵy jaıaý júrginshiler jolyn jóndeý jáne qalypqa keltirý kózdelip otyr.
Eske salaıyq, buǵan deıin Almatyda bir táýlikte aılyq jaýyn-shashynnyń jartysy jaýdy.
