Almatyda oıyn-saýyq orny mańynda jappaı tóbeles boldy

ALMATY. KAZINFORM – Almatynyń Bostandyq aýdanyndaǵy oıyn-saýyq oryndarynyń biriniń mańynda birneshe adamnyń bir er azamatty soqqyǵa jyqty.

Kýágerler janjal týraly polıtsııaǵa habarlap, oqıǵa ornyna birneshe patrýldik ekıpaj jetken.

Almaty polıtsııa departamentiniń málimetinshe, patrýldik polıtsııa qyzmetkerleri adamdardyń top bolyp jınalyp, janjalǵa ulasýy múmkin jaǵdaıdy der kezinde baıqap, jedel áreket etken.

Tártip saqshylary oqıǵaǵa qatysy bar azamattardyń bárin anyqtap, mán-jaıdy tekserý úshin aýdandyq polıtsııa bólimine jetkizdi. «Buzaqylyq» baby boıynsha qylmystyq is qozǵaldy. Polıtsııa tóbeleskenderdiń áreketine zań aıasynda quqyqtyq baǵa beriletinin habarlady.

– Bizdiń basty mindetimiz – azamattardyń qaýipsizdigin qamtamasyz etý. Qyzmetkerler tek patrýldeý rejıminde bolǵan joq, olar jaǵdaıǵa der kezinde aralasyp, bolýy múmkin qaqtyǵystyń aldyn aldy jáne qoǵamdyq tártipti saqtaý boıynsha sharalar qabyldady, - dedi Bostandyq aýdandyq polıtsııa basqarmasynyń bastyǵy Dıdar Ahanov.

Oqıǵanyń tolyq mán-jaıy anyqtalyp jatyr.

Eske salaıyq, buǵan deıin Almaty oblysy Besaǵash aýylynda bir top adam kóshede ótip bara jatqan jigitti uryp-soqqanyn jazǵanbyz.

Almaty oblysy polıtsııa departamenti bul oqıǵa boıynsha eki kúdikti ustalyp, ýaqytsha ustaý ızolıatoryna qamalǵanyn málimdedi.