Almatyda otshashýǵa tyıym salynyp, avtokólikter úshin aqyly aımaqtar engizilýi múmkin

ALMATY. KAZINFORM – Almatyda kólik, kásip jáne merekelik is-sharalarǵa qatysty jańa ekologııalyq erejeler engizý josparlanyp otyr. 

Jańa ekologııalyq usynystar «Ashyq NQA» portalynda jarııalandy. Ony Almaty qalasynyń ekologııa jáne qorshaǵan orta basqarmasy ázirlegen. Qujatta kórsetilgen ózgerister:

— Ákimdik janynan ekologııalyq keńes qurý jáne «Taza qala» aqparattyq júıesin engizý — ol aýanyń jaı-kúıin baqylaýǵa, turǵyndardy atmosferalyq aýanyń jaǵdaıy týraly habardar etýge jáne onlaın-ótinishter qabyldaýǵa múmkindik beredi;

— Aýa qatty lastanǵan kezde kásiporyndarǵa shekteýler engizý, mektepterdi qashyqtan oqytý formatyna kóshirý, balabaqshalar men mektepterge aýa tazartqyshtar ornatý, balalarǵa arnalǵan ashyq aýadaǵy is-sharalarǵa tyıym salý;

— Elektrli kólikti jáne qoǵamdyq kólikti damytý, eski kólikterdi satyp alý, qozǵaltqyshtardy uzaq qyzdyrýǵa shekteý qoıý;

— III sanattaǵy nysandarda (kómirmen jumys isteıtin káýaphanalar, monshalar, qurylys alańdary) mindetti túrde shyǵaryndylardy tazartý júıesin ornatý jáne lastaný deńgeıin turaqty túrde ólsheý.

— Tyıym salý usynylady: qoqys, japyraq, dóńgelek jaǵý, pırotehnıka (otshashý) qoldaný, súzgisiz generatorlar men tehnıkany paıdalaný, gaz tartylǵan aýdandarda qatty otyn túrin qoldaný.

Aqyly ekologııalyq aımaqtar

Odan bólek usynys boıynsha qalada ekologııalyq aımaqtar anyqtalady. Ol jol belgileri jáne tańbalarmen belgilenedi. Kólikter úshin bul aımaqqa kirý aqyly bolady — tarıf kóliktiń ekologııalyq klasyna baılanysty esepteledi. Jınalǵan qarjy ekologııalyq baǵdarlamalarǵa jáne qoǵamdyq kólikti damytýǵa jumsalady. Arnaıy tehnıka men tehnıkalyq talaptarǵa saı jergilikti turǵyndarǵa jeńildikter beriledi. Tólem «Taza qala» depozıttik júıesi arqyly júzege asyrylady.

Jobanyń tolyq mátinimen «Ashyq NQA» portalynda tanysýǵa bolady. Qoǵamdyq talqylaý 20 tamyzǵa deıin jalǵasady.

Eske salaıyq, jyl basynda Almatynyń eks-ákimi Erbolat Dosaev qala aýany lastaıtyn shyǵyndylar az bolýy tıis aımaqtarǵa bólinetinin aıtqan edi.