Almatyda ótken jyly otandyq jáne sheteldik ánshilerdiń qatysýymen 334 aýqymdy kontsert ótti
Almatyda ótken jyly qala alańdary men stadıondarda, arenalarda elimizdiń belgili ártisteri ǵana emes, sonymen birge álemdik deńgeıdegi juldyzdar óner kórsetti. Olardyń arasynda 50 Cent, Akon, Lara Fabian, Ne-Yo, Tarkan, Outlandish, Arash jáne basqa da kóptegen ánshiler bar. Bul is-sharalardyń 86%-yn kommertsııalyq jáne jeke kompanııalar uıymdastyrdy. Bul týraly Almaty qalasy Mádenıet basqarmasynyń basshysy Ǵanı Maılybaev aıtty, dep habarlaıdy Kazinform.
«2023 jyl mádenı is-sharalarǵa toly boldy, qalamyzda kóptegen tanymal ártister keldi. Jyldy qorytyndylasaq, Almatyda sheteldik ánshilerdiń 47, otandyq ártisterdiń 287 kontserti ótti. Odan bólek, aýqymdy is-sharalar, onyń ishinde halyqaralyq festıvaldar ótti. Tujyrymdamalyq turǵydan qarastyrsaq, onda bizdiń árbir is-sharamyz jeke brendke aınalyp, óz kórermenderin tartty. Qala ákimi mádenı astanamyz turǵyndar men qonaqtardy qyzyqty jobalarmen qýantyp, oqıǵaly týrızmdi damytýǵa jaǵdaı jasaý mindetin qoıyp otyr», - dedi Ǵanı Maılybaev.
Eske salsaq, ótken jyly 19 jyldyq úzilisten soń «Azııa Daýysy» halyqaralyq mýzykalyq festıvali ótken edi. Іs-shara aıasynda otandyq oryndaýshylar da, álemdik deńgeıdegi sheteldik ártister de úsh kún boıy óner kórsetti. Festıvaldiń hedlaıneri áıgili amerıkalyq The Black Eyed Peas toby boldy. Sonymen qatar byltyr The Spirit of Tengri zamanaýı etnıkalyq mýzyka festıvali, sonymen birge «Naýryz fest», «Almaty, lıýblıý tebıa», «Týǵan kúnińmen, Almaty», «Saǵyndym Almatymdy» jáne «Zımnıı Novogodnıı festıval» ótti.
«Megapolıste aýqymdy is-sharalardy ótkizý ekonomıkalyq oń áser etedi. Bul – jańa ýaqytsha jumys oryndaryn qurý, kóptegen týrıst tartý, oqıǵaly týrızmdi, qonaq úı bıznesin, meıramhanalar men jergilikti bıznesti damytý degen sóz. Eń bastysy, jas ártister men tanymal juldyzdardy bir sahnada óner kórsetýge múmkindik berý, olardyń aýdıtorııasyn keńeıtýge, ónerin ushtaýǵa septigin tıgizedi. Biz ártister men is-sharalardy uıymdastyrýshylarǵa 2023 jyly birlesip jumys istegenderi úshin alǵys aıtamyz jáne kórermender úshin 2024 jylǵa arnalǵan mádenı mazmundy baǵdarlama daıyndap jatyrmyz», - dedi Almaty qalasy Mádenıet basqarmasynyń basshysy Ǵanı Maılybaev.
Aıta keteıik, ótken jyly sondaı-aq qalalyq Mádenıet basqarmasy Open air formatynda is-sharalar – festıvaldar, kórmeler men kontsertter uıymdastyrdy. Olar qalanyń ár aýdanynda ótti. Osylaısha qala turǵyndaryna tegin kontsert kórýge múmkindik jasaldy.
