Almatyda ótken jyly 2,5 myńǵa jýyq otbasy baspanaly boldy
2023 jyldyń jeltoqsan aıynda «Jumys isteıtin jastar úshin satyp alý quqyǵynsyz jalǵa beriletin turǵyn úı» baǵdarlamasy aıasynda Almatynyń 35 jasqa deıingi jumys isteıtin jastarynan ótinish pen qujat qabyldaý aıaqtaldy, dep habarlaıdy Kazinform.
Atalmysh baǵdarlama aıasynda Naýryzbaı aýdanynda 3 jyl merzimge 2100 páter beriledi dep boljanyp otyr.
Sondaı-aq Almaty qalalyq kommýnaldyq ınfraqurylymdy damytý basqarmasynyń málimetinshe, ótken jyly 2 454 otbasy baspanaly boldy, onyń 2 049-y qoljetimdi turǵyn úı baǵdarlamasy boıynsha, 405-i kommýnaldyq turǵyn úı qorynan úı aldy.
«Almaty qalasynyń ákimi Erbolat Dosaevtyń jeke bastamasymen halyqtyń áleýmettik osal toptaryna (HÁOT) 2000 páter bólý týraly sheshim qabyldandy, onyń 20%-y jetim balalarǵa bólinedi. HÁOT úshin páter bólý 2024 jyldyń kókteminde josparlanǵan», - dep habarlady Almaty ákimdiginiń baspasóz qyzmeti.
Aıta keteıik, 2023-2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdamasy aıasynda Almatyda mynadaı memlekettik baǵdarlamalar iske asyrylyp jatyr:
- Jyldyq 2% mólsherleme boıynsha 2-10-20 («Baqytty otbasy»);
- Jyldyq 5% mólsherleme boıynsha 5-10-20 («Shańyraq»);
- «Almaty jastary» qalalyq baǵdarlamasy.
«Turǵyn úı baǵdarlamalarynyń operatory «Otbasy bank» AQ. Negizgi talaptar: tólem qabilettiligin rastaý jáne turǵyn úı qunynyń keminde 10% mólsherinde bastapqy jarna engizý. Osy baǵdarlamalar boıynsha turǵyn úıdi satý týraly aqparatpen banktiń saıtynan (www.hcsbk.kz jáne www.otbasybank.kz) tanysýǵa bolady», - dep habarlady ákimdikte.
