Almatyda osy jyly jol ınfraqurylymyna baılanysty qandaı jobalar bastalady
ALMATY. KAZINFORM - Bıyl Almatyda qalanyń 2030 jylǵa deıingi kólik qańqasynyń master-josparyna sáıkes birqatar jobalar oryndalady.
Qalalyq mobıldilik basqarmasynyń málimetinshe, bıyl birneshe iri kóshelerdi uzartý jumystary jalǵasady. Atap aıtqanda:
- Saın kóshesin Rysqulov dańǵylynan Móńke bı kóshesine deıin;
- Rysqulov kóshesin F.Ońǵarsynova kóshesinen qala shekarasyna deıin;
- Abaı kóshesin «Qalqaman» shaǵyn aýdanyndaǵy Áýezov kóshesinen qala shekarasyna deıin;
- Tóle bı kóshesin ıAssaýı kóshesinen qala shekarasyna deıin uzartý boıynsha qurylys-montajdaý jumystary júrgiziledi.
Al Jubanov kóshesin Momyshuly kóshesinen qala shekarasyna deıin uzartýdy 2027 jyly aıaqtaý josparlanǵan. Sondaı-aq qurylys jumystary júrip jatqan Almaty metrosynyń Qalqaman beketi 2026 jyly ashylýy tıis. Búgingi kúni qurylys protsesine 177 jumysshy men 54 birlik arnaıy tehnıka jumyldyrylǵan.
Qandaı jobalar bıyl bastalady
Osy jyldyń ishinde jobalaý jumystary aıaqtalǵan Raıymbek, Muqanov, Tilendıev kóshelerin uzartý jumystary bastalady.
- Qazirgi ýaqytta Almaty qalasyndaǵy Raıymbek dańǵylyn Jetisý kóshesinen Shyǵys avtomobıl aınalma jolyna deıin, Muqanov kóshesin Gogol kóshesinen Raıymbek dańǵylyna deıin jáne Tilendıev kóshesin Rysqulov dańǵylynan Sabataev kóshesine deıin uzartýǵa jobalaý-smetalyq qujattamalary ázirlenip, memlekettik saraptamanyń oń qorytyndysy alyndy. Qurylys-montajdaý jumystaryn bıýdjet qarajaty bólingen jaǵdaıda 2025 jyly bastaý josparlanǵan, - dep habarlady basqarmadan.
Qandaı jańa jobalar ázirlenip jatyr
Qalalyq mobıldilik basqarma 2025 jyldyń birinshi jartyjyldyǵynda taǵy úsh kósheni uzartý jáne BRT jelisin salý boıynsha jobalar daıyn bolatynyn habarlady.
- Soltústik aınalma kóshesin qala shekarasyna deıin, Hmelnıtskıı kóshesin «Qaırat» shaǵyn aýdannan Talǵar kúre jolyna deıin, Tilendıev kóshesin Sabataev kóshesinen qala shekarasyna deıin uzartýǵa jáne Raıymbek dańǵylynda BRT jelisiniń qurylysyna jobalaý-smetalyq qujattamalary ázirlenip jatyr. Atalǵan jobalardyń ázirleý jumystary osy jyldyń birinshi jartyjyldyǵyna aıaqtalady, - delingen basqarma jaýabynda.
Eske salaıyq, buǵan deıin 2025 jyly Almatyda 300 shaqyrym jol jóndeletinin jazǵanbyz.