Almatyda órtengen hosteldiń ıeleri anyqtaldy
Almatyda órtengen hosteldiń ıeleriniń kim ekeni anyqtaldy. Bul týraly óńirlik kommýnıkatsııalar qyzmeti alańynda Almaty qalalyq polıtsııa departamentiniń tergeý basqarmasy bastyǵynyń orynbasary, polıtsııa polkovnıgi Aıbat Myrzamadıev aıtty, dep habarlaıdy Kazinform.
«Bul tulǵalardyń kim ekeni belgili. Qazir ýaqytta olardyń ornalasqan jerin anyqtaý is-sharalary júrgizilip jatyr. Ázirge olardan eshkim jaýap alyp jatqan joq. Qazir biz barlyq qujattardy kóterip jatyrmyz», - dedi Aıbat Myrzamadıev.
Sondaı-aq Tótenshe jaǵdaılar mınıstri Syrym Sháriphanov júrgizilgen saraptama qorytyndysy boıynsha jaýapty laýazymdy tulǵalar anyqtalatynyn aıtty.
«Qazir qolda bar qujattardy zertteıtin bolamyz. Arnaıy órt-tehnıkalyq zerthanalar tekserýler júrgizedi. Osydan keıin jaýapty laýazymdy tulǵalar anyqtalyp, keıin qylmystyq is qozǵalatyn bolady», - dedi ol.
Osyǵan deıin órt kezinde zardap shekkenderge keshendi medıtsınalyq kómek kórsetiletini týraly jazdyq.
