Almatyda Ortalyq mýzeıge kirý quny ózgerdi

ALMATY. KAZINFORM – QR Memlekettik ortalyq mýzeıinde 25 shildeden bastap jańa baǵa qoldanysqa engiziledi.

Mýzeı ákimshiligi ekonomıkalyq jaǵdaıdyń ózgerýine jáne mekemeniń turaqty jumys isteýin qamtamasyz etý úshin qoldanystaǵy baǵa preıskýranty ózgeretinin habarlady.

– Qala mýzeılerindegi kirý bıletteri men aqyly qyzmetterdiń qunyn taldaý júrgizgende bizdiń qazirgi baǵalarymyz naryqtyq ortasha deńgeıden tómen ekenin kórsetti. Búgingi tańda QR Memlekettik ortalyq mýzeı qyzmetteri naryqtyq ortasha baǵadan 40-50% tómen baǵamen usynylady. Mysaly, Almaty qalasyndaǵy jáne óńirlik mýzeılerdegi eresekterge arnalǵan kirý bıletteriniń quny – 1 000 teńge. Alaıda bul mýzeılerdegi ekspozıtsııalyq keńistik pen kórmege qoıylǵan eksponattar sany Ortalyq mýzeımen salystyrǵanda birneshe ese az, - dep habarlady mýzeıden. 

Buǵan deıin Ortalyq mýzeıge kirý quny (1, 2, 3, 4 ekspozıtsııalyq zaldar) Qazaqstan Respýblıkasy azamattary úshin 500 teńge bolatyn bolsa, endi bılet baǵasy – 1 500 teńge. Ekspozıtsııalyq zaldarǵa qosa «Ashyq qor» (Altyn zaly) jáne «Antropologııa» zaldaryn aralaý – 2 000 teńge bolady. Stýdentter men zeınetkerler úshin negizgi ekspozıtsııalyq zaldar 700 teńge, barlyq zaldy aralaý – 1 500 teńge. 

Sheteldik azamattarǵa mýzeıge kirý quny – 2 000 teńge, ekskýrsııalyq qyzmetpen birge – 10 000 teńge. Jańa baǵalar 2025 jylǵy 25 shildeden bastap qoldanysqa engiziledi. 

Eske salaıyq, bıyl 30 qańtarda Prezıdent Qasym-Jomart Toqaevtyń Jarlyǵymen QR Memlekettik ortalyq mýzeıge ulttyq mártebe berildi.