Almatyda Ortalyq Azııa men Aýǵanstanǵa arnalǵan BUU ortalyǵy ashyla ma
ASTANA. KAZINFORM — Májiliste Qazaqstan Úkimeti men BUU arasyndaǵy Almaty qalasynda Ornyqty damý maqsattary jónindegi óńirlik ortalyqty qurý týraly kelisimdi ratıfıkatsııalaý máselesi qaraldy. Joba óńirlik habty damytýǵa jáne halyqaralyq yntymaqtastyqty nyǵaıtýǵa baǵyttalǵan.
Májiliste Qazaqstan Úkimeti men Birikken Ulttar Uıymy arasyndaǵy Almatyda Ortalyq Azııa men Aýǵanstanǵa arnalǵan Ornyqty damý maqsattary jónindegi óńirlik ortalyqty qurý týraly kelisimdi jáne oǵan qatysty ózara túsinistik týraly memorandýmdy ratıfıkatsııalaý jónindegi zań jobalaryn Syrtqy ister mınıstriniń orynbasary Álibek Baqaev tanystyrdy. Baıandamashynyń aıtýynsha, atalǵan qujattar óńirlik ortalyqtyń tolyqqandy jumys isteýine ınstıtýtsıonaldyq negiz qalyptastyrýǵa baǵyttalǵan.
Jobaǵa sáıkes, Almatydaǵy ortalyq BUU-nyń óńirdegi ınstıtýttary úshin negizgi tartylys núktesine aınalyp, ornyqty damý salasyndaǵy halyqaralyq jobalar men donorlyq baǵdarlamalardyń kóbeıýine yqpal etedi. Sonymen qatar bul Qazaqstannyń óńirlik jáne jahandyq deńgeıdegi kelissózderdegi ustanymyn nyǵaıtýǵa múmkindik beredi.
Ortalyqtyń Qazaqstan aýmaǵynda ornalasýy Almaty qalasynyń iskerlik jáne dıplomatııalyq ınfraqurylymyn damytýǵa serpin bermek. Sondaı-aq ulttyq múddelerdi halyqaralyq alańdarda ilgeriletýge yqpal etedi.
Budan bólek, ortalyq qyzmeti otandyq mamandardyń biliktiligin arttyryp, olardyń BUU júıesine keńinen tartylýyna jol ashady. Halyqaralyq qyzmetkerlerdiń rotatsııasy da qyzmet kórsetý naryǵynyń damýyna oń áser etedi dep kútiledi.
— Zań jobalary sonymen qatar QR Úkimetiniń Ortalyqtyń qyzmetin qoldaý úshin beretin qarajatyn paıdalaný sharttaryn aıqyndaýǵa baǵyttalǵanyn atap ótken jón. QR Úkimeti tarapynan josparlanyp otyrǵan 3 mln AQSh dollary kólemindegi jarna personaldy qamtamasyz etý shyǵyndaryn, sondaı-aq Ortalyqtyń jumys isteýine qajetti úı-jaılardy, konferents-zaldardy, oqý aýdıtorııalaryn, ІT-jabdyqtardy, baılanys jáne ınternet qyzmetterin jabdyqtaýǵa jumsalatyn shyǵyndardy jabatyn bolady. Jarnany basqarý personaldy tartý jáne basqarý, materıaldardy, jabdyqtar men qyzmetterdi satyp alý, kelisimsharttar jasasý, ákimshilendirý jáne Ortalyq qyzmetin qoldaýdy qamtıdy, — dedi spıker.
Osylaısha, kelisim óńirlik ortalyqtyń quqyqtyq negizin qalyptastyrsa, memorandým onyń qyzmetin qamtamasyz etý sharttaryn aıqyndaıdy.
Jalpy, Almatydaǵy óńirlik ortalyq BUU-nyń mańyzdy habtarynyń birine aınalyp, Ortalyq Azııa óńiriniń ornyqty damýyna úles qosady dep kútiledi.
Buǵan deıin májiliste halyqaralyq konventsııaǵa ózgeris engizý týraly zań jobasy qaralǵan edi.
