Almatydaǵy BUU óńirlik ortalyǵy qandaı mindet atqarady

ASTANA. KAZINFORM – Almaty qalasynda Birikken Ulttar Uıymynyń Ortalyq Azııa men Aýǵanstan úshin turaqty damý maqsattaryna (TDM) arnalǵan óńirlik ortalyǵyn qurý týraly kelisimge qol qoıyldy.

Bul týraly Memleket basshysy Qasym-Jomart Toqaev pen BUU Bas hatshysy Antonıý Gýterrıshtiń qatysýymen ótken resmı kezdesýde jarııa etildi. Prezıdent atalǵan kelisimdi mańyzdy tarıhı oqıǵa dep baǵalap, onyń Ortalyq Azııa óńiri úshin aıryqsha mańyzyn atap ótti.

– Bul – halyqaralyq qoǵamdastyqqa Ortalyq Azııanyń strategııalyq róli týraly berilgen naqty ári kúshti sıgnal. Búgingi kelisim – BUU-nyń Almatyda jańa óńirlik ortalyq qurýyn resmı túrde bekitetin qujat, – dedi Qasym-Jomart Toqaev.

Óz kezeginde BUU Bas hatshysy Antonıý Gýterrısh bul qadamdy «óńir úshin jańa kezeńniń bastalýy» dep atady.

– Almaty – tarıhı tamyry tereń, tabandylyǵy myqty jáne bolashaǵyna senimdi qala. Qazaqstan – kóp jyldan beri Batys pen Shyǵystyń, dástúr men ınnovatsııanyń arasyndaǵy altyn kópir. Sondyqtan bul ortalyq dál osy jerde ornalasýy – zańdy sheshim, – dedi Antonıý Gýterrısh.

BUU-nyń Qazaqstandaǵy ókildigi málim etkendeı, jańa óńirlik ortalyq jeke qurylym nemese qor bolyp sanalmaıdy. Ol BUU Ekonomıkalyq jáne áleýmettik máseleler departamentiniń qurylymyna enedi. Sonymen qatar, bul ortalyq BUU-nyń Turaqty damý jónindegi toptarymen, óńirlik agenttiktermen jáne turaqty úılestirýshilermen tyǵyz baılanysta jumys isteıtin bolady.

Ortalyqtyń qurylýy týraly sheshimdi BUU Bas Assambleıasy qabyldaǵan. Al ortalyqty Almatyda ornalastyrý jónindegi kelisimge Qazaqstan Úkimeti men BUU arasynda qol qoıyldy.

BUU-nyń Qazaqstandaǵy keńsesiniń málimetinshe, bul – Ortalyq Azııa men Aýǵanstanǵa ǵana baǵyttalǵan, turaqty damý maqsattaryn ilgeriletýge arnalǵan alǵashqy óńirlik ortalyq.

Jańa ortalyqtyń basty mindeti – Turaqty damý maqsattaryn óńirlik erekshelikterge beıimdep, Ortalyq Azııa elderi men Aýǵanstannyń osy saladaǵy kúsh-jigerin qoldaý.

Jumys úsh negizgi baǵytqa toptastyrylady:

• ornyqty ekonomıkalyq ósim;

• áleýmettik ádilettilik;

• qorshaǵan ortany qorǵaý.

Sondaı-aq ortalyq:

• óńirlik baǵdarlamalar men jobalardy ázirleıdi;

• BUU agenttikteriniń jumysyn úılestiredi;

• memlekettik organdarmen, qarjy uıymdarymen, jeke sektormen jáne ÚEU-men áriptestik ornatady.

Aıryqsha nazar 2024-2034 jyldarǵa arnalǵan teńizge shyǵa almaıtyn elderge arnalǵan is-qımyl baǵdarlamasyn iske asyrýǵa jáne Aýǵanstanǵa qoldaý kórsetýge baǵyttalady.

Sonymen qatar ortalyq óńirlik dıalog pen tájirıbe almasýdyń, tsıfrlyq transformatsııany ilgeriletýdiń, jastardyń belsendiligin arttyrýdyń jáne beıbit, turaqty qoǵam qurýdyń alańyna aınalmaq.

– Biz ortalyq «Bolashaq úshin pakt» sheńberinde de mańyzdy ról atqarady dep kútemiz. Ol tsıfrlyq sheshimder arqyly serpindi ózgeristerge jol ashady, – delingen BUU taratqan aqparatta.

Ortalyqty resmı iske qosý úshin birneshe uıymdastyrýshylyq másele sheshilýi tıis. Atap aıtqanda:

• ortalyqtyń naqty mindetterin aıqyndaý;

• qarjylandyrý tetikteri men memorandýmyn ázirleý;

• shtattyq qurylym men bıýdjet jobasyn bekitý;

• ortalyq basshylyǵyn taǵaıyndaý josparlanyp otyr.

Aıta keteıik, buǵan deıin Memleket basshysy BUU Bas hatshysy Antonıý Gýterrıshpen kelissóz júrgizgenin jazǵan bolatynbyz.