Almatyda órt sóndirýshi Arslan Qurmanbekovke eskertkish taqta ornatyldy
Almaty qalasyndaǵy № 7 órt sóndirý bóliminiń aýmaǵynda qyzmettik boryshyn oryndaý kezinde qaza tapqan aǵa órt sóndirýshi Arslan Qurmanbekovke arnalǵan memorıaldyq taqta ornatyldy, dep habarlaıdy Kazinform.
Memorıaldyq taqtanyń ashylý saltanatyna Arslan qyzmet etken garnızonnyń basshylyǵy, jeke quramy jáne týǵan-týystary qatysty.
Almaty qalalyq Tótenshe jaǵdaılar departamentiniń basshysy Nurlan Atyǵaev azamattyq qorǵaý aǵa serjanty Arslan jaýapty qyzmetker, kásibı jaýynger jáne saýatty maman bolǵanyn atap ótti.
«Órt sóndirýshi mamandyǵy, árıne, qaýpi joǵary mamandyq. Sol qaıǵyly kúni ol óz isine adal bolyp, batyldyq pen kásibılik tanytty. Búgin biz óz mindetin erlikpen atqarǵan jaýyngerimizdi eske alyp, qurmet kórsetý úshin jınaldyq. Eliniń batyryn tárbıelegen Arslannyń anasyna úlken alǵysymdy bildirgim keledi. Bizdiń mindetimiz — áriptesimizdi jadymyzda saqtaý jáne óskeleń urpaqty osyndaı batyldyq úlgimen tárbıeleý», - dedi ol.
Memorıaldyq taqtany ashý rásimi Arslannyń anasy - Baqytgúl Joldasbekqyzyna jáne TJD bastyǵyna berildi.
Jınalǵandar memorıalǵa gúl shoqtaryn qoıyp, marqumdy bir mınýt únsizdikpen eske aldy.
Eske salaıyq, 8 mamyr kúni Medeýde tutanǵan otpen kúres kezinde órt sóndirýshi Arslan Qurmanbekov kóz jumǵan edi.
Keıin Prezıdent Jarlyǵymen qyzmettik boryshyn oryndaý kezinde kórsetken janqııarlyq erligi úshin TJD Órt sóndirý jáne avarııalyq-qutqarý jumystary qyzmetiniń №7 ÓSB aǵa órt sóndirýshi-qutqarýshysy Arslan Qurmanbekov ІІІ dárejeli «Aıbyn» memlekettik nagradasymen marapattaldy.
