Almatyda órt sóndirý kóligi jol apatyna ushyrap, bir adam qaıtys boldy
ALMATY. KAZINFORM – Almatyda adam ólimine ákelgen jol apaty boldy.
Qalalyq polıtsııa departamentiniń málimetinshe, 17 qarashada saǵat 00:40 shamasynda Tımırıazev jáne Áýezov kósheleriniń qıylysynda órt sóndirý qyzmetiniń arnaıy kóligi men Toyota Camry markaly jeńil avtokólik soqtyǵysqan.
- Aldyn ala málimetterge sáıkes, órt sóndirý kóligi shaqyrtý boıynsha arnaıy jaryq jáne dybys sıgnaldaryn qosyp, oqıǵa ornyna bara jatqan. Qıylystan ótý kezinde jeńil avtokólikpen soqtyǵysqan. Jol-kólik oqıǵasy saldarynan jeńil avtokóliktiń júrgizýshisi alǵan jaraqattarynan oqıǵa ornynda kóz jumdy. Al arnaıy kóliktiń júrgizýshisi medıtsınalyq mekemege jetkizildi, - dep habarlady departamentten.
Qazir adam ólimine ákep soqqan jol-kólik oqıǵasy deregi boıynsha polıtsııa departamentiniń Anyqtaý basqarmasy qylmystyq is qozǵaǵan. Oqıǵanyń barlyq mán-jaıy men sebebin jan-jaqty anyqtaýǵa baǵyttalǵan qajetti tergeý áreketteri júrgizilip jatyr.
Eske salaıyq, Atyraýda jol apaty saldarynan eki adam kóz jumdy.