Almatyda órt shyqqan balalar úıin jóndeý úsh aıda aıaqtalady

ALMATY. KAZINFORM — QR Bala quqyqtary jónindegi ýákil Dınara Zákıeva Almatydaǵy «Perzent» balalar úıindegi órtten keıin tárbıelenýshilerdiń jaǵdaıymen tanysty.

— Keshe órt bolǵan «Perzent» qaıyrymdylyq qorynyń ǵımaratynda turatyn balalardy baryp kórdim. Qazir olardy sanatorıı ǵımaratyna ornalastyrǵan, barlyq qajetti jaǵdaı jasalǵan. Balalarmen sóılesip, olarǵa oıynshyqtar jetkizýdi suradym. Barlyǵy as iship otyrdy, — dep jazdy ol.

Zákıevanyń aıtýynsha, qazir balalar úıinde 29 bala bar, al altaýyn ata-analary alyp ketken.

Birneshe kún ishinde tárbıelenýshilerdi qordyń basqa ǵımaratyna kóshirý josparlanyp otyr. Ol ǵımarat qazir mektepke jaqyn bolý úshin arnaıy daıyndalyp jatyr.

— Órt bolǵan ǵımarattaǵy jóndeý jumystary úsh aı ishinde aıaqtalady, — dedi balalar ombýdsmeni.

Eske salaıyq, buǵan deıin Almatyda Naýryzbaı aýdany Altyn orda kóshesi boıynda ornalasqan jekemenshik balalar úıinde órt shyqqanyn habarlaǵanbyz.

Almaty qalasy TJD málimetinshe, balalar úıi aýlasyndaǵy ashana ǵımaraty janǵan. Ǵımaratta adamdar bolmaǵan.

Tótenshe jaǵdaılar mınıstrligi keıinirek 1000 sharshy metr aýmaqty sharpyǵan jalynnyń sóndirilgenin málimdedi.

Mekemede bolǵan 35 tárbıelenýshi men qyzmetkerler ýaqytsha saýyqtyrý sanatorııine ornalastyrylǵany belgili boldy.

QR Oqý-aǵartý mınıstrliginiń Balalardyń quqyqtaryn qorǵaý komıteti Almatydaǵy balalar úıindegi órtke qatysty túsinik berdi.