Almatyda órt-qutqarý sporty boıynsha álem chempıonaty ótedi
ASTANA. KAZINFORM - Almatyda 15-18 tamyz aralyǵynda jasóspirimder men jastar, jasóspirim qyzdar men boıjetken qyzdar arasynda 2024 jylǵy órt-qutqarý sportynan álem chempıonaty ótedi, dep habarlaıdy QR TJM baspasóz qyzmeti.
2014 jyly Almatyda eresekter arasynda Álem chempıonaty ótken bolatyn, dál sol kezde órt-qutqarý sporty tarıhynda alǵash ret áıelder arasynda Álem chempıonaty ótkizildi.
Álemdegi úzdik jas órt sóndirýshi-qutqarýshy ataǵy úshin alty eldiń Belarýs, Bolgarııa, Qazaqstan, Reseı, Slovakııa, Chehııa komandalary arasynda saıys ótedi. Sonymen qatar, Kamerýn men Saýd Arabııasynyń ókilderi baqylaýshy retinde shaqyrylǵan.
Tórt kún boıy sportshylar órtti sóndirý tájirıbesinde qoldanylatyn túrli synaqtardy baǵyndyrady.
Saltanatty ashylý rásimi 15 tamyzda saǵat 20.00-de Ortalyq stadıonda ótedi. Shoý arnaıy otty effektilermen, estrada juldyzdarynyń qatysýymen ótetin kontserttik baǵdarlamamen, TJ jaǵdaıynda órt sóndirýshilerdiń kúshin kórsetetin qutqarýshy sportshylardyń jandy qoıylymdar kórsetýimen ótedi. Sondaı-aq qatysýshy komandalardyń sherýi uıymdastyrylady.
18 tamyzda saǵat 20:00-de saltanaty jabylý rásimi jáne álem chempıonatynyń jeńimpazdaryn marapattaý rásimi bolady. Ortalyq stadıonda "Has Sak" etno-folklorlyq tobynyń ártisteri óner kórsetedi. Іs-shara saltanatty otshashýmen aıaqtalady.
