Almatyda ormanǵa qonǵan ushaqty qutqarýshylar tikushaǵy evakýatsııalady
ALMATY. KAZINFORM — Almaty qalasynyń qutqarý qyzmeti An-2 ushaǵyn tasymaldaý boıynsha operatsııany júzege asyrdy.
Qutqarý qyzmetiniń málimetinshe, Túrgen áýejaıynan 10 shaqyrym qashyqtyqtaǵy ormandy aýmaqqa májbúrli túrde qonǵan ushaq ári qaraı ushyp kele almaǵan. Oǵan kómektesý úshin Mı-8AMT tikushaǵy jumyldyryldy.
— Ekıpajdyń joǵary kásibıligi men úılesimdi is-qımylynyń arqasynda áýe kemesi tikushaqtyń syrtqy aspasyna kóterilip, Túrgen áýejaıyna aman-esen jetkizildi. Oqıǵa saldarynan qaza tapqandar men zardap shekkender joq, — delingen habarlamada.
Eske salaıyq, buǵan deıin Mańǵystaý dalasynda TJM qutqarýshylary Ulybrıtanııadan kelgen týrısterge kómek kórsetti.
