Almatyda Oraza Aıt merekesi toılanyp jatyr
ALMATY. KAZINFORM — Almaty meshitterinde Aıt namazy oqyldy.
Qasıetti Ramazan aıy aıaqtalǵannan keıin múmin musylmandar tańerteń meshitke baryp Aıt namazyn oqıdy. Qazaq jerinde qaı zamannan bar dástúr búgingi kúni de óz jalǵasyn taýyp keledi.
Búgin Almatyda Aıt namazy tańǵy saǵat 07:00–de oqyldy. Biraq almatylyqtar qala meshitterine tańǵy 6-dan bastap aǵyla bastady. Avtobýsta, kóshede jaınamaz ustap, basyna taqııa kıgen adamdardyń qarasy kóp boldy.
Búgin musylman qaýymynyń merekesi úshin Alataý aýdany Baýyrjan Momyshuly kóshesiniń boıyndaǵy jańadan salynǵan úlken meshit bir kúnge ashyldy. Dinı nysannyń qujattary áli tolyq daıyn bolmaǵandyqtan, ol keıin ýaqytsha qaıta jabylady.
— Ardaqty almatylyqtar! Barshańyzdy Oraza aıt merekesimen shyn júrekten quttyqtaımyz! Qala turǵyndary men meshit jamaǵatyna qolaıly jaǵdaı jasaý úshin jáne meshit aýlalaryndaǵy kólik qozǵalysyn retteý maqsatynda Almaty qalasy, Baýyrjan Momyshuly kóshesiniń boıyndaǵy úlken meshit Oraza aıt merekesine bir kúnge ashylady. Alaıda, meshit qujattarynyń tolyq bolmaýyna baılanysty aıt namazynan keıin qaıta ýaqytsha jabylady. Qujattary tolyqtaı rásimdelip, tirkeýden ótken soń resmı túrde ashylatyn bolady, — dep jazdy áleýmettik jelide Almaty qalasynyń bas ımamy Tólebı Ospan.
Jańa meshit mańynda úlken avtoturaq bolǵanyna qaramastan, kelgen kóliktiń kóptiginen júrgizýshiler kólikti ekinshi-úshinshi qatarmen turaqqa qoıyp jatty. Al Baýyrjan Momyshuly kóshesiniń boıynda tańǵy 6-dan keptelis bastaldy. 7-ge qaraı keptelis Móńke bı kóshesinen Rysqulov kóshesine deıin jetti.
Sondaı-aq jol boıynda polıtsııa qyzmetkerleri kólik qozǵalysyn baqylady, al jańa meshit mańynda jedel járdem jáne órt sóndirý kólikteri qoıyldy. Al namaz ýaqytynda meshit ishi lyq toldy.
Aıt namazynan shyqqan jurt biraz ýaqyt tarqaspaı, bir-birin quttyqtap, qol alysyp, tós qaǵystyrdy.
Eske salaıyq, buǵan deıin Ózbekstan basshysy Oraza aıt qarsańynda 488 adamǵa raqymshylyq jasaǵanyn jazǵanbyz.