Almatyda óńirlik Travmatologııa jáne ortopedııa ortalyǵy qurylady

ALMATY. KAZINFORM – Almatyda №4 qalalyq klınıkalyq aýrýhana bazasynda óńirlik Travmatologııa jáne ortopedııa ortalyǵyn qurý josparlanyp otyr. 

Qalalyq qoǵamdyq densaýlyq saqtaý basqarmasynyń habarlaýynsha, jańa ortalyq aýyr jaraqat alǵan naýqastarǵa qabyldaý bólimindegi shuǵyl kómekten bastap ońaltý kezeńine deıin barlyq satyda mamandandyrylǵan jáne joǵary tehnologııalyq medıtsınalyq kómek kórsetedi.

№4 qalalyq klınıkalyq aýrýhana – qalanyń jetekshi medıtsınalyq mekemeleriniń biri. Munda jyl saıyn 19 myńnan astam naýqas em qabyldap, 12 myńǵa jýyq ota jasalady. 2025 jyly iri býyndardy endoprotezdeý boıynsha 2 250 ota jasalǵan. Ortalyqty qurýǵa daıyndyq aıasynda aýrýhananyń qabyldaý bólimi jańǵyrtyldy.

– Jańa ortalyqtyń ashylýy medıtsınalyq kómektiń kólemin keńeıtip qana qoımaı, eldiń ońtústik óńirindegi travmatologııalyq qyzmetti úılestirýdi kúsheıtýge múmkindik beredi. Sonymen qatar ol mamandardyń biliktiligin arttyrý, sondaı-aq ǵylymı-zertteý jáne bilim berý baǵyttaryn damytý mindetin de atqarady, - delingen habarlamada.

Joba Almaty ákimdiginiń, Qoǵamdyq densaýlyq saqtaý basqarmasynyń jáne Qazaqstan Respýblıkasy Densaýlyq saqtaý mınıstrliginiń qoldaýymen júzege asyrylady. Atalǵan bastama jaraqattaný, jedel medıtsınalyq járdem qyzmeti jáne medıtsınalyq avıatsııa máseleleri jónindegi úılestirý keńesinde qaraldy.

Akademık N.D. Batpenov atyndaǵy respýblıkalyq ulttyq ǵylymı travmatologııa jáne ortopedııa ortalyǵy bul bastamany qoldady. Mamandardyń baǵalaýynsha, №4 qalalyq klınıkalyq aýrýhananyń kadrlyq áleýeti men materıaldyq-tehnıkalyq bazasy qajetti talaptarǵa tolyq sáıkes keledi.

Eske salaıyq, buǵan deıin Almatyda onkologııa boıynsha Quzyret ortalyǵy iske qosylǵanyn habarlaǵanbyz.