Almatyda óńirdegi eń iri tehnologııalyq forýmdy ótkizý jaıy talqylandy
ALMATY. KAZINFORM — Almaty qalasynyń ákimdiginde «GITEX Central Asia/Kazakhstan 2026» halyqaralyq forýmyn ótkizý týraly usynysty qaraýǵa arnalǵan keńes ótti. Bul týraly Almaty qalasy ákimdigi habarlady.
Talqylaýǵa qalanyń Tsıfrlandyrý basqarmasynyń ókilderi men Dubai World Trade Centre (DWTC) kompanııasynyń is-sharalardy basqarý jónindegi vıtse-prezıdenti Trıksı Lomırmand qatysty.
Forýmdy 2026 jyly 2-4 maýsym aralyǵynda «Atakent» kórme ortalyǵynyń aýmaǵynda ótkizý josparlanyp otyr. Іs-sharanyń bastamashysy – DWTC-tiń enshiles kompanııasy jáne 1981 jyldan beri jyl saıyn Dýbaıda ótetin álemdegi eń iri tehnologııalyq kórme GITEX GLOBAL-dyń uıymdastyrýshysy Kaoun International kompanııasy.
Bul bastamany júzege asyrý Qazaqstan Respýblıkasynyń Prezıdenti Qasym-Jomart Toqaevtyń «Jasandy ıntellekt dáýirindegi Qazaqstan: ózekti mindetter jáne olardy tsıfrlyq transformatsııa arqyly sheshý» atty halyqqa Joldaýynda aıqyndalǵan mindetterge saı keledi. Memleket basshysy Joldaýynda Qazaqstannyń basty maqsaty – Eýrazııanyń tsıfrlyq habyna aınalý ekenin atap, biryńǵaı ulttyq tsıfrlyq ekojúıeni qalyptastyrý men zamanaýı ІT-sheshimderdi ekonomıkaǵa engizýdi jedeldetýdi tapsyrǵan bolatyn.
Almatyda GITEX Central Asia forýmyn ótkizý – osy strategııalyq maqsattardy júzege asyrý jolyndaǵy mańyzdy qadam bolmaq. Bul shara elimizge álemdik deńgeıdegi tehnologııalyq kompanııalardy tartýǵa, sondaı-aq ınnovatsııalar salasyna ınvestıtsııa tartýǵa múmkiforýndik beredi.
GITEX forýmy 105 elden kelgen 6,8 myńnan astam kompanııany biriktirip, tájirıbe almasý men strategııalyq seriktestikter ornatýdyń jetekshi alańy. Forýmnyń Almatyda ótýi Ortalyq Azııa elderiniń jahandyq tehnologııalyq keńistikke yqpaldasýyna jáne halyqaralyq yntymaqtastyqty nyǵaıtýǵa jol ashady.
GITEX Central Asia 2026 baǵdarlamasyna paneldik sessııalar, ınnovatsııalar kórmesi, ınvestorlarmen kezdesýler ótip, otandyq ІT-sheshimder tanystyrylady. Qazirgi tańda forýmdy joǵary halyqaralyq deńgeıde ótkizý úshin uıymdastyrýshylyq jáne tehnıkalyq jaıttar egjeı-tegjeıli pysyqtalyp jatyr. Іs-sharany joǵary halyqaralyq deńgeıde ótkizý úshin áleýetti alańdar men qajetti ınfraqurylymdyq sheshimder qarastyrylyp jatyr.