Almatyda onkologııa boıynsha Quzyret ortalyǵy iske qosyldy
ALMATY. KAZINFORM – Almaty onkologııalyq ortalyǵy bazasynda Quzyret ortalyǵy ashyldy. Bul - megapolıste onkologııalyq kómekti uıymdastyrý júıesin jetildirýge baǵyttalǵan jańa qurylym.
Qoǵamdyq densaýlyq saqtaý basqarmasynyń málimetinshe, jańa ortalyqtyń maqsaty — erte dıagnostıkany kúsheıtý, medıtsınalyq kómekti úılestirý. Jańa qurylym klınıkalyq qyzmetti de, uıymdastyrýshylyq-ádistemelik jumysty da biriktiredi. Munda qaterli isikke kúdik bar naýqastarǵa jáne dıspanserlik esepte turǵan azamattarǵa konsýltatsııalyq-dıagnostıkalyq kómek kórsetiledi.
- Ortalyqta aýrýdy erte anyqtaýǵa, naqty dıagnoz qoıýǵa jáne patsıentterdi mamandandyrylǵan emge jedel joldaýǵa basymdyq beriledi. Ortalyq mýltıdıstsıplınarlyq qaǵıdamen jumys isteıdi: kúrdeli jaǵdaı onkologtar, hırýrgter, radıologtar, hımıoterapevter jáne basqa da beıindi mamandardyń qatysýymen talqylanady, - dep habarlady basqarmadan.
Sonymen qatar ortalyq alǵashqy medıtsınalyq-sanıtarlyq kómek uıymdarymen ózara baılanysty kúsheıtip, onkologııalyq naýqastardy emdeýdiń biryńǵaı standarttaryn engizedi. Munda trepan-bıopsııa júıeleri, endoskopııalyq keshender, saraptamalyq deńgeıdegi ÝDZ jáne mammografııa apparattary, sondaı-aq kompıýterlik jáne magnıttik-rezonanstyq tomografııa qurylǵylary bar. Oǵan qosa, ımmýnogıstohımııalyq jáne molekýlalyq-genetıkalyq zertteýler júrgizýge múmkindik beretin beınemorfologııa júıesi engizilgen.
- Ortalyqtyń taǵy bir baǵyty — qaladaǵy medıtsınalyq uıymdarǵa ádistemelik qoldaý kórsetý jáne elimizde onkologııalyq qyzmetti damytýdyń keshendi jospary aıasyndaǵy kórsetkishterdi taldaý. Munda dárigerlerdi oqytý, kóshpeli semınarlar ótkizý jáne turǵyndarǵa arnalǵan ashyq esik kúnderin uıymdastyrý kózdelgen, - delingen vedomstvo habarlamasynda.
Eske salaıyq, buǵan deıin Almatyǵa onkologııalyq em alý úshin qaı elderdiń azamattary kelip jatqanyn jazǵanbyz.