Almatyda ómirden ótken áıel 6 adamǵa donor boldy
ALMATY. KAZINFORM – Almatyda 1962 jylǵy áıel 6 adamǵa donor bolyp, ómir syılady.
Almaty qalasy Ortalyq qalalyq klınıkalyq aýrýhanasynyń oftolmologııa bólimi meńgerýshisi Gýlzat Abdraımova kúrdeli kóz aýrýy saldarynan kórý qabileti nasharlaǵan eki naýqasqa kózdiń qasań qabyǵyn aýystyrý otasyn jasady.
Birinshi naýqas 1983 jyly týǵan. Buryn kózdiń ortalyq qasań qabatyna kirgen jaraqat alyp, saldarynan kózi kórmeı qalǵan. Ekinshi naýqasqa kózdiń qaraýytýy jáne kórý qabiletiniń tómendeýine sebep bolǵan janama keratopatııa otasy jasalǵan. Qasań qabyqqa jasalǵan otadan keıin eki naýqastyń da kórý qabileti jaqsarǵan.
Almaty qalasy qoǵamdyq densaýlyq saqtaý basqarmasynyń málimetinshe, bul naýqastarǵa ómirden ótken 1962 jylǵy áıel donor boldy. Marqum týystarynyń ruqsatymen mańyzdy aǵzalardy transplantatsııalaýǵa múmkindik berildi:
- júregi -1988 jyly týǵan naýqasqa;
- baýyry- 1982 jylǵy naýqasqa;
- oń jaq búıregi - 1996 jyly týǵan naýqasqa;
- sol jaq búıregi - 2017 jyldan beri transplantatsııany kútken 1966 jylǵy naýqasqa;
- kózdiń qasań qabyǵy - 1983 jyly jáne 1956 jyly týǵan eki naýqasqa berildi.
- Protsesti uıymdastyrý men baqylaý Densaýlyq saqtaý mınıstrligine qarasty Respýblıkalyq transplantatsııa jáne joǵary tehnologııalyq medıtsınalyq qyzmetter ortalyǵy men Almaty qalasynyń jetekshi transplantatsııa ortalyǵy - kardıologııa jáne ishki aýrýlar ǵylymı zertteý ortalyǵymen, Syzǵanov atyndaǵy hırýrgııalyq Ulttyq ǵylymı zertteý ortalyǵymen jáne Ortalyq qalalyq klınıkalyq aýrýhanamen birigip júrgizildi.
Donordyń jas ereksheligine qaramastan dárigerler aǵzalardyń jaqsy jaǵdaıda ekendigin jáne ári qaraı da jaqsy qyzmet atqara alatyndyǵyn atap ótti. Bul jaǵdaı donorlyqtyń úlken adamgershiliktiń jáne adam ómirin saqtap qalý men densaýlyǵyn jaqsartýdaǵy mańyzdy sheshim ekendiginiń dáleli boldy, - dep habarlady basqarmadan.
Vedomstvo bul Ortalyq qalalyq klınıkalyq aýrýhanasynda osy jyly jasalǵan ekinshi qasań qabaqty aýystyrý otasy ekenin atap ótti.
Eske salaıyq, Qaraǵandyda robot-hırýrgtiń kómegimen mıǵa ota jasalady.