Almatyda Olımpıada chempıony Anatolıı Hrapatyı atyndaǵy zal ashyldy
ASTANA. KAZINFORM — Armııa ortalyq sport klýbynyń Almaty fılıalynda Qorǵanys mınıstri general-polkovnık Rýslan Jaqsylyqov jańa aýyr atletıka zalyn ashty, dep habarlaıdy Qorǵanys mınıstrliginiń baspasóz qyzmeti.

Qorǵanys vedomstvosy basshysynyń Almaty qalasyna jumys sapary aıasynda Armııa ortalyq sport klýbynda aýyr atletıka federatsııasynyń qoldaýymen qurylǵan jańa zaldyń saltanatty ashylýy ótti.

Sport nysanyna Olımpıada chempıony Anatolıı Hrapatyıdyń esimi berildi. Іs-sharaǵa QR Parlamenti Májilisiniń depýtattary, sport qoǵamdastyǵy jáne AOSK-nyń ataqty sportshylary qatysty.

Anatolıı Hrapatyı — aýyr atlet, bes dúrkin álem chempıony (1985-1987, 1989-1990), 1988 jylǵy Olımpıada chempıony, 1996 jylǵy Olımpıada oıyndarynyń kúmis júldegeri.
Ómiriniń sońǵy jyldarynda QR Qorǵanys mınıstrligi AOSK sport bóliminiń aǵa ofıtseri bolyp jumys istedi. Sportshy 2008 jyldyń tamyzynda qaıǵyly jaǵdaıda qaza tapty.
Sapar barysynda mınıstr kúrdeli jóndeýden ótken Jaqsylyq Úshkempirov atyndaǵy kúres zalyn, sportshylardyń dańq murajaıyn, fýtbol alańyn, ashanany jáne basqa da ınfraqurylym nysandaryn aralady.

Qorǵanys mınıstri basshylyqqa Qarýly kúshterde dene shynyqtyrý men sportty damytýǵa baǵyttalǵan birqatar tapsyrma júktedi.
Buǵan deıin habarlanǵandaı, Qorǵanys mınıstrligi Jeńistiń 80 jyldyǵyna arnalǵan áskerı sherýge qatysty málimdeme jasady.