Almatyda oqýshylardyń ýlanýy: RFMM qyzmetkerlerinen stafılokokk bakterııasy anyqtaldy
ALMATY. KAZINFORM – Almatydaǵy Respýblıkalyq fızıka-matematıka mektebiniń (RFMM) oqýshylarynyń ýlanýyna baılanysty zertteýdiń aldyn ala nátıjeleri belgili boldy.
Almaty qalasynyń sanıtarııalyq-epıdemıologııalyq baqylaý departamentiniń (SEBD) málimetinshe, aýrý oshaǵy oqshaýlanyp, ınfektsııanyń berilýiniń boljamdy faktorlary anyqtalǵanyna qaramastan, atalǵan derek boıynsha tergep-tekserý tolyq aıaqtalǵan joq.
Bul jaǵdaıǵa baılanysty departament mamandary naýqas oqýshylar men as blogynyń 38 qyzmetkerin teksergen. Sonymen qatar 12–15 qazan aralyǵynda zerthanalyq zertteýler júrgizý úshin daıyn taǵamnyń 7 synamasy, daıyn ónimniń 2 synamasy, shıki ónimniń 3 synamasy, betkeıler men ydystardan alynǵan 30 shaıyndy, sýdyń 5 synamasy jáne dezınfektsııalaý quraldarynyń 2 synamasy alynǵan.
- Zerthanalyq zertteýler nátıjesinde keıbir daıyn taǵamdardan mıkrobtyq lastaný, taǵam synamalary men ydystardan alynǵan shaıyndylardan ishek taıaqshalary tobynyń bakterııalary anyqtaldy. Sonymen qatar dezınfektsııalaý quralynyń jumys eritindisi normatıvtik talaptarǵa sáıkes kelmegen, - dep habarlady departamentten.
SEBD málimetine sáıkes, jedel ishek ınfektsııalary naýqastarǵa taǵam arqyly juqqan. Júrgizilgen saýalnama nátıjesinde barlyq oqýshylar mektep-ınternat ashanasynda tamaqtanǵanyn aıtqan.
- Saýalnamaǵa qatysqandardyń basym bóligi aýrýdyń paıda bolýyn taýyq etinen daıyndalǵan rýlet pen beshbarmaqty tutynýmen baılanystyrǵan, - dep atap ótti SEBD.
Odan bólek zerthanalyq zertteýler nátıjesinde tórt qyzmetkerden Staphylococcus aureus (stafılokokk) bakterııasy anyqtalǵan. Olar memlekettik bas sanıtarııalyq dárigerdiń tıisti qaýlysy negizinde jumystan ýaqytsha shettetildi.
Departament mamandary as blogy men ınternattyń úı-jaılaryn tekserý barysynda tamaqtanýdy uıymdastyrýǵa, qujattamany júrgizýge, azyq-túlik ónimderin saqtaý sharttaryn saqtaýǵa, asúı múlkin tańbalaýǵa qatysty sanıtarııalyq-epıdemıologııalyq talaptardyń buzylýyn anyqtaǵan.
Tergep-tekserý nátıjeleri boıynsha ákimshilik quqyq buzýshylyq týraly 2 hattama jasalǵan:
- - «RFMM» KEAQ-ǵa qatysty QR ÁQBtK 425-babynyń 1-bóligi boıynsha ákimshilik quqyq buzýshylyq týraly hattama toltyryldy.
- - «MasterFood» JShS-ne qatysty QR ÁQBtK 425-babynyń 2-bóliginde kózdelgen ákimshilik quqyq buzýshylyq belgileri boıynsha materıaldar polıtsııa departamentine joldandy.
Sondaı-aq «MasterFood» JShS ashanasy men RFMSh mektep-ınternatynyń qyzmeti 60 kún merzimge toqtatylǵan. Departament mamandary mektep ashanasy sanıtarııalyq-epıdemıologııalyq talaptardyń buzýshylyqtary tolyq joıylǵanda ǵana qaıta ashylatynyn málimdedi.
Eske salaıyq, 14 qazanda RFMM-niń 48 oqýshysy jiti ishek ınfektsııasynyń belgilerimen aýrýhanaǵa jatqyzyldy.
Keıin RFMM ákimshiligi oqýshylardyń aýrýhanaǵa túsýine baılanysty túsinik berdi. 14–16 qazan aralyǵynda mektep sabaqtary onlaın formatta ótti.
Sondaı-aq atalǵan derek boıynsha Bostandyq aýdandyq polıtsııa basqarmasy janyndaǵy polıtsııa bóliminde qylmystyq is qozǵaldy.
Keıin aýrýhanaǵa túsken oqýshylardyń sany artqany belgili boldy.
22 qazanda Almatyda ýlanǵan RFMM oqýshylarynyń barlyǵy emhanadan shyǵaryldy.
