Almatyda oqý jyly qarsańynda polıtsııa jumysy kúsheıtiledi
ALMATY. KAZINFORM — Almatyda oqý jyly qarsańynda kólik keptelisiniń artýy kútiledi. Sondyqtan qalada polıtsııa kúsheıtilgen rejımde jumys isteıdi.
Polıtsııa departamenti Qoǵamdyq qaýipsizdik basqarmasynyń bastyǵy Tımýr Noǵaıbaevtyń aıtýynsha, qalanyń birqatar kóshesinde qurylys-montaj jumystary júrip jatyr. Olardyń bir bóligi qyrkúıekke deıin aıaqtalyp úlgermeıdi. Bul jol qozǵalysyn qıyndatýy múmkin.
— Qala boıynsha oqý jyly bastalǵanǵa deıin aıaqtalmaıtyn kóptegen qurylys-montaj jumysy júrgizilip jatyr. Sonymen qatar kólik júktemesi artady. Sondyqtan jol qozǵalysy qaýipsizdigin qamtamasyz etetin jaıaý patrýlder kóshe qıylystaryna qoıylady. Alda keptelis turǵanyna qaramastan, júrgizýshilerdiń jol qıylysyna shyǵyp, osylaısha qozǵalysty bógeıtinin jıi kóremiz. Sondyqtan quqyq buzýshylyqtar men mundaı jaǵdaıdyń týyndaýyna jol bermeý úshin patrýldik polıtsııa narıadtaryn mindetti túrde qoıatyn bolamyz, — dedi Tımýr Noǵaıbaev.
Keptelisterdiń aldyn alý úshin patrýldik polıtsııa bólimshelerin Almatyǵa kiretin negizgi baǵyttarǵa da qoıý josparlanyp otyr.
— Patrýldik polıtsııa narıadtaryn qalaǵa kiretin joldarda da mindetti túrde qoıatyn bolamyz. Bul — Talǵar jáne Qulja traktileri, sondaı-aq Qarasaı jáne Іle aýdandary tarapynan keletin baǵyttar, — dedi ol.
Bul rette polıtsııa oqý jylynyń basyna qaraı baǵdarshamdar jumysyn ózgertýdi josparlap otyrǵan joq. Joldaǵy jaǵdaı beınebaqylaý kameralary arqyly qadaǵalanatyn bolady.
Eske salaıyq, buǵan deıin Almaty turǵyndary kóshelerdiń qaıta-qaıta qazylýyna qatysty shaǵymdandy.
