Almatyda ókpe qaterli isigine robot-assıstent kómegimen alǵashqy ota jasaldy
ALMATY. KAZINFORM — Almaty onkologııalyq ortalyǵynda robottandyrylǵan hırýrgııalyq júıeniń kómegimen ókpe qaterli isigine qatysty alǵashqy eki operatsııa jasaldy.
Densaýlyq saqtaý mınıstrliginiń málimetinshe, operatsııalar Almaty onkologııalyq ortalyǵynyń hırýrgtarymen birlesip, Harbın medıtsınalyq ýnıversıtetiniń onkologııalyq aýrýhanasynyń keýde hırýrgııasy bóliminiń basshysy, Qytaıdan kelgen professor Sıýı Shıdýnnyń qatysýymen halyqaralyq sheberlik synyby aıasynda oryndaldy. Árbir operatsııa shamamen 2,5 saǵatqa sozylǵan.
— Sarapshynyń medıtsına salasyndaǵy tájirıbesi 35 jyldan asady. Ol keýde qýysy aǵzalaryndaǵy isikterge qatysty 3 myńnan astam operatsııa jasaǵan. Robot-assıstentti hırýrgııa shaǵyn tilikter arqyly kúrdeli operatsııalar jasaýǵa múmkindik beredi. Bul rette operatsııalyq aımaqtyń úsh ólshemdi (3D) keskini men joǵary dáldiktegi quraldar qoldanylady. Tıisti medıtsınalyq kórsetilimder bolǵan jaǵdaıda, mundaı tásil qan joǵaltýdy jáne operatsııadan keıingi aýyrsynýdy azaıtyp, naýqastyń qalpyna kelýin jedeldetýi múmkin, — dep habarlady vedomstvodan.
Buǵan deıin ortalyqta robottandyrylǵan hırýrgııalyq júıeniń kómegimen qursaq qýysy men kishi jambas aǵzalaryndaǵy isikterge qatysty 20-dan astam operatsııa jasalǵan. Endi bul baǵyt keýde qýysy aǵzalarynyń onkologııalyq aýrýlaryn emdeý salasynda da keńeıip keledi.
Eske salaıyq, Japonııada robot arqyly qaterli isikke alǵash ret qashyqtan ota jasaldy.
