Almatyda oqıtyn atyraýlyq stýdent UNAI qosymshasyn oılap tapty

ATYRAÝ. KAZINFORM — Almaty tehnologııalyq ýnıversıtetiniń 3-kýrs stýdenti Nurdáýlet Baıhanov jańa qosymsha qurastyrdy. Atyraýlyq stýdent oǵan UNAI degen ataý bergen. 

Jańashyl stýdent Nurdáýlet Baıhanovtiń aıtýynsha, bul qosymshamen UBT suraqtaryna daıyndalýǵa, saraptama jasaýǵa, jeke jáne toptyq saıys ótkizýge bolady.

«Qazir bul formattaǵy qosymshalar kóp. Biraq, UNAI-dyń basqa qosymshalardan birneshe ereksheligi bar. Birinshiden, ony tegin qoldana alasyz. Ekinshiden, oqýshynyń UBT-ǵa daıyndalyp, bilim deńgeıiniń kóterilgenine saraptama jasaýǵa bolady. Bul qosymsha «Qalaı 100 myń oqýshyǵa kómektese alamyz?» degen izdenisten týyndady. Maqsatym — bıyl 100 myń túlektiń osy baǵdarlamany paıdalanyp, joǵary oqý oryndaryna tegin grantqa túsýine kómektesý. Qosymsha ár túlektiń bilimin jetildirýine kishkene bolsa da úles qosady degen oıdamyn», - deıdi Nurdáýlet Baıhanov. 

Onyń pikirinshe, bilikti maman ataný úshin aldymen UBT-dan joǵary ball alý qajet. Jastar memlekettik grantpen joǵary bilim alyp, maman ıesi atansa, elimizdiń álemdik deńgeıge shyǵýyna úles qosar edi. 

«Shoqan Ýálıhanov atamyzdyń «Halyqtyń kemeline kelip, órkendep, ósýi úshin eń aldymen azattyq pen bilim qajet» degenin udaıy jadymda ustap júremin. Men de elimniń damýyna osylaı óz úlesimdi qosyp, halqymyzdyń jaǵdaıy jaqsarǵanyn qalaımyn», - deıdi Nurdáýlet Baıhanov. 

Stýdenttiń aıtýynsha, UNAI qosymshasyn paıdalaný úshin App Store jáne Play market baǵdarlamasy arqyly júkteý kerek. Qosymshaǵa tirkelgen soń, bastapqy bettegi «Oınaý» batyrmasy arqyly birden UBT-ǵa daıyndyqty bastaýǵa bolady. Al, arnaıy nusqaýlyqty unai.kz Instagram nemese Tik Tik paraqshasynan kórýge múmkindik bar. 

Eske sala ketelik, buǵan deıin atyraýlyq ǵalymnyń shubat pen qyzylshadan jasaǵan sýsyny shyǵaryla bastaǵanyn habarlaǵan bolatynbyz.