Almatyda oq atqandar keshirim suraýmen sytylyp ketpesin – depýtat qarý-jaraqty tekserýdi usyndy
ASTANA. KAZINFORM – Májilis depýtaty Nartaı Sársenǵalıev Almatyda toı ústinde oq atqandardy jaýapqa tartýdy jáne qarapaıym azamattar qolyndaǵy qarý-jaraqqa ınventarızatsııa júrgizýdi usyndy.
Bul jóninde depýtat QR Іshki ister mınıstri Erjan Sádenovke saýal joldady.
Buǵan deıin áleýmettik jelide kólikte otyryp aspanǵa oq atqan azamattardyń beınejazbasy taraǵan edi. Oqıǵa Almaty oblysy Eńbekshi qazaq aýdanynyń Túrgen aýylynda bolǵan.
«Úılený toıy qurmetine serýenge shyqqandar avtomat pen tapanshadan ońdy-soldy oq jaýdyryp qyzyq qýǵan. Onysyn abyroı kórip vıdeo-fotosyn áleýmettik jelige júktegen. Bul degenińiz Táýelsiz eldiń Zańyn elemeýdiń, jazasyz qalatyndaryna senimdi bolýdyń kópe-kórneý kórinisi emes pe? Siz ben bizdiń ata-ájemiz, ata-anamyz, bala-shaǵamyz, baýyrlarymyz, otandastyrymyz júretin kóshede qyzyq qýyp, oq jaýdyrýǵa kim ruqsat berdi», - dedi N. Sársenǵalıev Májilistiń jalpy otyrysynda.
Depýtat prokýratýra men sot-tergeý organdary oqıǵany saralap, oǵan qatysy bar azamattarǵa zańǵa saı qatań jaza kesýi keregin aıtýda.
Sondaı-aq, Іshki ister mınıstrligi qarapaıym azamattar qolyndaǵy qarý-jaraqqa ınventarızatsııa júrgizip, zańǵa sáıkes kelmeıtinderin tárkileýi qajet. Osy salany retteıtin normatıvtik-quqyqtyq aktilerdi qatańdatý qajettigi de aıtyldy.
«Bul – jelikken jastardyń jáı ǵana buzaqylyǵy emes, memlekettik tártipke, zańǵa ashyq qarsylyǵy. Halyqtan, eldiń ishki qaýipsizdigi men qoǵam tynyshtyǵyna jaýapty quqyq qorǵaý organdarynan esh aıylyn jımaı, dóńaıbat kórsetýi. Aıtpaqshy, oq atqandar beınekameraǵa qarap keshirim surap jazadan qutylyp ketpeý kerek. Mundaı tásilden eldiń ábden yǵyry shyqty. Erteń bularǵa elikteýshiler shyǵyp, atys uıymdastyrsa ne bolmaq? Sol sebepti bul zań buzýshylarǵa zańǵa sáıkes shara qoldaný protsesi kópke jarııa túrde júrýi tıis», - dep talap etti depýtat.
Oǵan qosa, az kúnde orta mektep túlekteri, túrli oqý oryndarynyń bitirýshileri attestat, dıplom alý keshterin jappaı atap ótedi. Májilis depýtaty túlektermen, ata-analarmen túsindirý jumystaryn júrgizýdi, avtokólikpen jarysatyn jastardyń apatqa ushyrap jazym bolmaýy úshin jaǵdaı jasaýdy usyndy.
