Almaty oblysynda eks-depýtat jalǵan qujat rásimdep, 474 mln teńge alǵan

ASTANA. KAZINFORM — Qarjylyq monıtorıng agenttigi Almaty oblysy boıynsha departamenti Qarasaı aýdandyq máslıhatynyń eks-depýtatyna qatysty asa iri kólemde alaıaqtyq jáne qylmystyq kiristerdi zańdastyrý faktisi boıynsha tergeý júrgizýde.

Derekke qaraǵanda, kúdikti memleketten sýbsıdııa alý maqsatynda Almaty oblysynyń aýyl sharýashylyǵy basqarmasyna «Nagrada» túrindegi tańqýraı kóshetterin satyp alý týraly jalǵan qujattardy usynǵan. Somasy 947 mln teńgeni qurady.

- Nátıjesinde ol 474 mıllıon teńge dep kórsetilgen somanyń 50% kóleminde zańsyz sýbsıdııa alǵan. Bul kiristerdi jylystatý úshin kúdikti 21 jeke kásipkermen kóshetterdi oraý, tıeý, túsirý jumystaryn oryndaýdy kórsetetin jalǵan kelisimsharttardy qamtıtyn kóp deńgeıli shemany ázirlegen, biraq is júzinde bul jumystar oryndalmaǵan.

Atalǵan jalǵan kelisimder men tólem qujattary negizinde 431 mln teńge somaǵa qolma-qol qarajat alyndy, - dep jazdy departamentten.

Sonymen qatar urlanǵan qarajattardy zańdy aınalymǵa tartý maqsatynda ol jubaıynyń atynan baǵaly qaǵazdarmen operatsııalar júrgizip, qosymsha 89 mln teńge qylmystyq tabys tapqan. Qylmystyq tabysqa Almaty qalasynan eki bólmeli páter jáne Toyota Highlander avtokóligin satyp alǵan.

- Atalǵan múlikke, sondaı-aq 50 mln teńge aqsha jáne 91 mln teńge quny bar baǵaly qaǵazdarǵa tyıym salyndy.

Memleketten urlanǵan 170 mln teńgeni kúdikti Qonaev qalasyndaǵy kazınoǵa qurtqany belgili boldy, - dep tolyqtyrdy tekserýshi organnan.

Sottyń sanktsııasymen kúdikti 2 aıǵa qamaýǵa alyndy. Qylmystyq is júrgizý kodeksiniń 201-babyna sáıkes basqa aqparat jarııalanbaıdy.

Buǵan deıin BQO-da sýbsıdııa berý kezinde 12 mln-ǵa jýyq teńge orynsyz paıdalanylǵan.