Almatyda nóserli jańbyr kútiledi
ALMATY. KAZINFORM – Almatyda búgin kúndiz nóserli jańbyr kútiledi. Taýly aımaqta jaýyn-shashyn mólsheri 28 mm-ge deıin jetti.
Buǵan qalanyń kommýnaldyq qyzmeti tas-túıin daıyn. Jaýyn-shashyn kezinde sý basýdyń aldyn alý jáne sýdyń kedergisiz aǵyp ketýi úshin motopompalarmen, bagrlermen jáne basqa da shants quraldarymen jabdyqtalǵan 52 jedel mobıldi brıgadanyń kezekshiligi uıymdastyrylady. 2,5 myń qap qum daıyndaldy. Kúndizgi ýaqytta jaýyn-shashyn kezinde barlyǵy 465 birlik arnaıy tehnıka, 28 motopompa jáne 810 jumysshy jumyldyrylady.
«Qazgıdromet» RMK-nyń dereginshe, 30 maýsymda qalada 11 mm-ge deıin jaýyn-shashyn, al, Kishi Almaty shatqalynda 28 mm-ge deıin jaýǵan qatty jańbyrdan keıin maýsym aıyndaǵy jaýyn-shashynnyń jartysyna jýyǵy (59 mm) túsip, qatty jeldiń saldarynan qulaǵan butaqtarmen, qoqys, laımen bitelgen aryq jelileri men jol astyndaǵy ótkelder 320 jumysshynyń jáne 92 birlik arnaıy tehnıkanyń kúshimen tazartyldy. Túngi ýaqytta 210 tekshe metr qoqys shyǵaryldy.
Qutqarýshylar aýa raıynyń buzylýyna baılanysty qala turǵyndary men qonaqtaryna taýǵa shyqpaýǵa keńes berdi. Júrgizýshilerge aǵashtardyń qulaý jáne elektr jelileriniń úzilý qaýpine baılanysty avtokólikti jol jıegine qoımaǵan abzal.
«Sý tasqynynyń aldyn alý úshin qala turǵyndarynan aryq pen kanaldy qoqysqa toltyryp, bitep tastamaýdy suraımyz. Quqyq buzýshylar QR ÁQBtK-niń 505-baby boıynsha «Qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq ınfraqurylym nysandaryn buzý, qala men eldi mekenderdiń jasyl jelekterin joıý jáne zaqymdaý» boıynsha ákimshilik jaýapkershilikke tartylady», - dep habarlady ákimdikten.
