Almatyda nelikten qandala kóbeıdi - maman jaýaby
ALMATY. KAZINFORM – Almatyda jasyl jelekti bıologııalyq óńdeý jumystary júrip jatyr.
Ekologııa jáne qorshaǵan orta basqarmasynyń málimetinshe, kún saıyn tańerteń jáne túngi ýaqytta adam men janýarlar úshin qaýipsiz bıologııalyq quraldar qoldanylady.
Jıenbaev atyndaǵy Qazaq ǴZI bóliminiń jetekshisi Nurjan Muhamadıev qandala sanynyń kúrt artýyn bıylǵy aýa-raıynyń erekshe qubylystarymen baılanystyrady.
— Kóktemniń uzaqqa sozylǵan salqyndyǵy men artynsha aýa temperatýrasynyń kúrt 35 gradýsqa deıin kóterilýi — jóke nemese aǵash qandalasy sekildi jándikterdiń kóbeıýine óte qolaıly jaǵdaı boldy. Halyq arasynda olardy «sasyq qandala» dep ataıdy, sebebi olarmen janasqanda jaǵymsyz ıis shyǵady. Olar negizinen aýla aýmaqtarynda kóbeıedi, óıtkeni turǵyndardyń sanıtarlyq kesýge kelispeýinen mundaı sharalar sırek ótkiziledi. Al ortalyq kóshelerde karaǵashtar ósse de, bıoóńdeý júıeli júrgiziletindikten mundaı jappaı taralý joq, — dedi maman.
Nurjan Muhamadıev bul jándikterdiń adam men qorshaǵan ortaǵa qaýipti emes ekenin, biraq qolaısyzdyqtar týdyrýy múmkin ekenin atap ótti.
— Olar qaraǵashtyń tuqymymen qorektenedi, japyraqtar men butalarda mekendeıdi. Olarmen kúres úshin evkalıpt maıy, torlar, dıhlofos sııaqty quraldardy qoldanýǵa bolady. Aýla ishinde qustardy tartý úshin qus uıalaryn ornatý usynylady. Sonymen qatar Almaty sııaqty iri qalalarda kógaldandyrýdyń zamanaýı tásilderi hımııalyq quraldardy keńinen qoldanýdy shekteıdi, óıtkeni bul paıdaly jándikter men topyraq tepe-teńdigine zııan keltirýi múmkin, — dedi ol.
Ekologııa basqarmasynyń málimetinshe, 2025 jyly bıologııalyq óńdeý jumystary tórt kezeńde júrgiziledi: • birinshi kezeń — sáýir aıynda aıaqtaldy; • ekinshi kezeń — 1–30 maýsym aralyǵy; • úshinshi kezeń — 5 shildeden 5 tamyzǵa deıin; • sońǵy kezeń — 15 tamyz ben 20 qyrkúıek aralyǵy.
Eske salaıyq, Almatyda 10 myń mektep oqýshysy APV-ǵa qarsy vaktsına aldy.