Almatyda nelikten №1 qalalyq perzenthana ǵımaraty súriledi
ALMATY. KAZINFORM – Almatyda №1 qalalyq perzenthananyń jańa ǵımaratynyń qurylysy bastaldy. 1938 jyly salynǵan burynǵy ǵımarat tolyqtaı súrildi.
Qala ákimdiginiń málimetinshe, ǵımaratqa júrgizilgen tehnıkalyq tekserý nátıjesinde tirek qurylymdary men ınjenerlik jelileriniń 100 paıyz tozǵany anyqtalǵan. Órt qaýipsizdigi, jeldetý, gıdrooqshaýlaý júıeleri qazirgi zaman talaptaryna saı kelmegen, sondaı-aq naýqastardy tasymaldaýǵa arnalǵan jedel saty bolmaǵan.
- Jer telimi tektonıkalyq jarylym aımaǵynda ornalasqanyna qaramastan, ǵımaratta birde-bir ret seısmıkalyq kúsheıtý jumystary júrgizilmegen. Ǵımarattyń seısmıkalyq normalar talaptaryna sáıkes kelmeıtini jóninde QazQSǴZI-diń tıisti qorytyndysy bar, - dep habarlady ákimdikten.
Almaty ákimdigi nysan medıtsınalyq kómek kórsetý standarttaryna da saı bolmaǵanyn atap ótti. Onyń ishinde: qabyldaý bóliminde shuǵyl ota jasaıtyn zal bolmaǵan, patsıentterdi triage (bólý) júıesimen qabyldaýǵa jaǵdaı jasalmaǵan, operatsııalyq blok pen reanımatsııada ınfektsııalyq baqylaýǵa arnalǵan arnaıy úı-jaılar qarastyrylmaǵan.
- Ǵımarattyń irgetasyn kúsheıtý múmkin bolmady. Al kúrdeli jóndeý men ony ustaý ekonomıkalyq turǵydan tıimsiz dep tanyldy. Sondyqtan 1938 jylǵy ǵımaratty súrip, onyń ornyna jańasyn salý týraly sheshim qabyldandy, - dep túsindirdi qala basshylyǵy.
Jobaǵa sáıkes, jalpy aýmaǵy 10 myń sharshy metrden asatyn úsh qabatty jańa ǵımarat salynady. Jańa perzenthana 155 orynǵa eseptelgen. Zamanaýı palatalar ana men balaǵa jaıly jaǵdaı jasap, energııa únemdeıtin tehnologııany engizý paıdalaný shyǵyndaryn azaıtýǵa múmkindik beredi.
Al operatsııalyq zaldardyń jalpy sany ekiden tórtke deıin artady. Sondaı-aq qabyldaý bóliminiń qýaty táýligine 25-ten 38 ótinishke deıin ulǵaıtylady. Jańa korpýs paıdalanýǵa berilgennen keıin kórsetiletin medıtsınalyq qyzmet sany jylyna 11 myńnan 14 myńǵa deıin ósip, bosaný sany 5 myńnan 9 myńǵa deıin artady dep josparlanyp otyr.
Qurylys jumystaryn kelesi jyldyń naýryz aıynda aıaqtaý josparlanǵan. Osy kezeńde perzenthana jumysyn toqtatpaıdy — barlyq bólimshe ýaqytsha Seıfýllın dańǵylyndaǵy «A» blogyna ornalastyrylady.
Eske salaıyq, byltyr Almaty perzenthanalarynda bıyl ana ólimi tirkelgen joq.